Барыта 2100 киһи, 291 тиэхиньикэ баһаардарга үлэлии сылдьаллар. Миэстэтигэр олохтоох быһаарыынан, 791 834 га сири тайаан умайар 122 термо-туочуканы умуруорууну тохтоттулар. Ааспыт сууккаҕа 14 уот умулунна.

Нэһилиэнньэлээх пууннарга суоһуур баһаардар Өймөкөөн улууһун Хара Тумулугар, Горнай Өртүгэр (Солоҕон), Маҥараһыгар, Күөрэлээҕэр бааллар. Итилэргэ уот дэриэбинэлэриттэн 5 килэмиэтир чугас умайар. 10 км иһинэн күөдьүйэр баһаардаах нэһилиэктэр: Горнай Кэптинэ уонна Бэс Күөлэ, Сунтаар Кэмпэндээйитэ.

Ойууру кэтиир уонна тыаны харыстыыр департамент салайааччыта Владимир Иванов эппитинэн, баһаарга 14 көтөр аал көмөлөһөр.

--Ол курдук, үс “Бе-200”, икки “Ил-76” сөмөлүөттэри Сунтаарга ыытарга былаанныыбыт. “Өлүөнэ очуос таастара” национальнай пааркаҕа -- “Ми-8” бөртөлүөтү. Ону сэргэ авиация күүһүн Ленскэйгэ, Үөһээ Бүлүүгэ туһана сылдьабыт. Горнайга, Бүлүүгэ, Ньурбаҕа “Ан-26” сөмөлүөттэр ардах былыттарын мунньан, самыыры түһэрүөхтэрэ, -- диир.