--Бүгүн, ол эбэтэр атырдьах ыйын 4 күнүгэр, өрөспүүбүлүкэ үрдүнэн барыта 173 баһаар баара бэлиэтэнэр. Итинтэн 58 баһаарын умуруорарга күүстээх үлэ бара турар. Уопсайа 2495 киһи уоту бохсор, 319 тиэхиньикэ сүүрэ сылдьар.

Суукка устатыгар 12 баһаары төгүрүктээтибит, 9 баһаары умуллардыбыт. Ол эрээри, хомойуох иһин, эбии 11 баһаар көһүннэ.

Ааспыт сууккаҕа авиацияттан бөртөлүөт өттө үлэлээтэ. Ол курдук, Хаҥаласка, Кэбээйи Сииттэтигэр, Уус Алдан Кыыллаайытыгар дьону көмөҕө быраҕыыга, уу кутуутугар туһалаатылар. МЧС көтөр ааллара “Ил-76”, “Бе-200” буруо хойуутуттан сылтаан Мииринэй аэропордуттан кыайан көппөккө тураллар.  Ардах ыҥырар “Ан-26” сөмөлүөт Өлүөхүмэҕэ үлэлээтэ. Бүгүн Өлүөхүмэҕэ, Ленскэйгэ, Горнайга, табыллар буоллаҕына, Дьокуускайга көтүөҕэ.