Хаҥалас бөһүөлэгин таһыгар уу кутталлаах 1000 см кэрчиккэ тиийэн баран, икки чаас устата 47 см. түспүт. Муус үөһээҥҥи кырыыта Дьокуускай куоракка тиийбит, уу таһыма 816 см., түөрт чаас устата 9 см. түспүт. Бу сиргэ уу кутталлаах таһыма 827 см. тэҥнэһэр.
Алдан өрүс мууһа этэҥҥэ устар. Муус аллараа кырыыта Уус Таатта сэлиэнньэтигэр тиийбит, уу таһыма кутталлаах кэрчиккэ тиийбэтэх. Оттон муус үөһээҥҥи кырыыта Уус Майа улууһун Эдьээн сэлиэнньэтигэр тиийбит, муус хойуутук устар, уу таһыма үрдүгэ суох.
Бүлүү өрүс мууһун үөһээҥҥи кырыыта Бүлүү куораты ааспыт, уу таһыма 612 см. буолбут, ырбыыламмыт. Бу диэки уу таһымын кутталлаах кэрчигэ 980 см. тэҥнэһэр. Оттон муус аллараа бүүрүгэ Үөһээ Бүлүү бөһүөлэгин ааспыт.
Халыма өрүс кэлиҥҥи сылларга олохтоммут болдьоҕуттан Магадан уобалаһын Сеймчан бөһүөлэгин таһыгар 4 күнүнэн эрдэ эһиннэ, муус хойуутук устар диэн иһитиннэрэллэр. Саха сиригэр Зырянка таһыгар өрүскэ ырбыы үөскээбит, суукка иһигэр уу таһыма 19 см. эбиллэн, 320 см. буолбут, манна уу кутталлаах таһыма 770 см. тэҥнэһэр. Орто Халыма бөһүөлэгин таһыгар муус кэбирээбит, уу таһыма суукка иһигэр 23 см. эбиллэн, 274 см. тэҥнэспит, кутталлаах таһым – 1200 см.
- 0
- 0
- 0
- 0
- 0
- 0