Санатар буоллахха, РФ бүддьүөтүттэн ыалдьыбыт дьону эмтиир быраастар уонна мэдиссиинэ орто, алын сүһүөх үлэһиттэрин муус ыйынааҕы төлөбүрдэригэр үп көрүллүбүтэ, итинтэн Саха сиригэр  37,1 мөл. солк. анаммыта. Төлөбүрү эмп үлэһиттэрэ муус устарга, ыам ыйыгар, бэс ыйыгар үлэлээбиттэрин иһин ылаллар. РФ Бырабыыталыстыбатын ыам ыйын 15 күннээҕи дьаһалынан ыам ыйынааҕы төлөбүргэ Саха сиригэр дойду бүддьүөтүттэн 460 мөл. 236 тыһ. солк. ыытыллыбыт.  

Муус устар ыйга эмтиир быраастар 66 тыһ. солк., орто сүһүөх үлэһит 40 тыһ. солк, алын сүһүөх үлэһит, ол иһигэр суһал көмө суоппардара 20 тыһ. солк. ылбыт буолуохтаахтар.

Коронавирус дьаҥын эмтиир сорох эмп тэрилтэлэрин үлэһиттэрэ муус устар ыйынааҕы төлөбүрдэрин толору кээмэйин ылбатахтарын социальнай ситиминэн иһитиннэрбиттэр. СӨ прокуратуратын пресс-сулууспата иһитиннэрбитинэн, ыарыыны эмтээһиҥҥэ быһаччы сибээстээх тэрилтэлэри барыларын хабан туран, үлэһиттэргэ төлөбүр толору төлөммүтүн-төлөммөтөҕүн туһунан бэрэбиэркэ ыытыллар.  

Эрдэ ыытыллыбыт бэрэбиэркэ кэнниттэн уопсайа 10 мөл. солк. суумаҕа регионнааҕы төлөбүр ситэри оҥоһуллубатаҕын быһаарбыттар уонна бу итэҕэстэр туоратыллыбыттар. Тустаах биэдэмэстибэ иһитиннэрбитинэн, муус устар ыйдааҕы төлөбүрү эмп үлэһиттэрэ бары туппуттар.