Дьокуускай куорат уокуругар элбэх кыбартыыралаах олорор дьиэлэри дезинфекциялааһын былаана 50% туолла диэн куорат администрацията иһитиннэрэр.
Ол курдук, былааҥҥа 2424 дьиэ баарыттан пандемия кэмигэр 1435 дьиэҕэ дезинфекция ыытыллыбыт. Бу 59,2% буолар.
Мархаҕа, Хатаска уонна Пригороднай оройуонугар профилактикалыыр үлэ 100% барбыт.
Ол да буоллар сорох дьон профилактикалыыр үлэ хаачыстыбатын сүөргүлүүр эбиттэр.
Мария Кириллина, Хатас олохтооҕо: «Биһиэхэ киирэн тахсаллар эрэ диэхпин сөп. Онон-манан ыстараат буут биэрэллэр. Биһиги нэһилиэк куораттан чугас буолан, кэлии-барыы олус элбэх. Хомойуох иһин ыарыы элбии турар. Итини хонтуруолга ылар буоллар».
Степан Птицын, Марха олохтооҕо: «Биһиги дьиэбитин, сураҕа, бу соторутааҕыта эрэ дезинфекциялаабыттара. Ыам ыйыгар оҥорбуттарын өйдөөбөппүн. Бэйэбит даачаҕа көспүт буолан, хата, коронавирустан куоппут курдук санана сылдьабыт».
- 0
- 0
- 0
- 0
- 0
- 0