РФ Доруобуйаҕа харыстабылын министиэристибэтэ итиннэ быһаччы орооһон, кууһунан уонна биирдиилээн атыыланар эмтэргэ нолуогу эппэккэ туран, эми оҥорон таһаарааччылар сыаналарын регистрациялаата. Итинтэн сиэттэрэн, Арассыыйа бары эрэгийиэннэрин салалталара Антимонопольнай сулууспаны кытта бииргэ үлэлээн, сөбүлэһэн баран, кууһунан уонна биирдиилээн атыыланар эмтэргэ сыана төһө буолуохтааҕын кээмэйин быһан бигэргэтиэхтэрэ.
Судаарыстыбаннай реестргэ киирбитинэн, 200-тээх «Авифавир» 10 табылыакката 1000 солк. буолуоҕа. Ол аата 40 устуукалаах эмп 4000 солк., 50 устуукалаах 5000 солк. тэҥнэһиэхтэрэ. Оттон 200-тээх 40 уонна 100 устуука табылыаккалаах «Арепливир» 4000 уонна 10000 солк. атыыланыахтара. ФАС быһаарарынан, коронавирус дьаҥын бохсор эмп-том биир кэлим реестргэ киллэриллибитин кэнниттэн, биллэн турар, итиннэ нолуогун сыаната эбиллэн биэриэҕэ. Холобур, 50 табылыаккалаах эмкэ нолуок эбиллэн, 5500 солк. эмтиэкэлэргэ атыыга тахсара күүтүллэр. Итинтэн сылтаан эмтиэкэлэргэ сыана син биллэрдик түһүөҕэ дииллэр. ФАС этэринэн, сүрүн реестргэ киирбит эмтэр сыаналара, ортотунан, 50 бырыһыан кэриҥэ түһүөхтээх. Фавипиравирдаах эмп нолуок эбиилэрин киллэрэн туран, эмтиэкэлэргэ 6875 солк. атыыга тахсыаҕа. Билигин итинник 50 устуука табылыаккалаах эмтэр Арассыыйа эмтиэкэлэригэр 11 320 солк. саҕалаан 16 306 солк. тиийэ сыаналанан атыылана тураллар.
- 0
- 0
- 0
- 0
- 0
- 0