Дьокуускайга 26 түбэлтэ бэлиэтэннэ. Нерюнгри, Мииринэй куораттарга 9-туу, Мэҥэ Хаҥаласка 7, Бүлүүгэ 5, Алдаҥҥа 4, Аллараа Халыма, Өймөкөөн, Өлөөн, Таатта, Эбээн Бытантай улуустарыгар 3-түү, Эдьигээн, Кэбээйи, Нам, Сунтаар, Томпо, Уус Алдан, Уус Маайа, Хаҥалас, Чурапчы улуустарыгар 2-лии, Ньурбаҕа 1 ыарыһахтаахтар.
Кэлиҥҥи сууккаҕа өрөспүүбүлүкэ лабораторияларыгар хамсык дьаҥар 789 чинчийии оҥоһулунна. Ыарыы саҕаланыаҕыттан барыта 870 098 тест чинчийиини ааста. Өрөспүүбүлүкэтээҕи оперыстаап ыалдьыбыт сибикигит биллэххитинэ, дьиэҕитигэр бырааһы ыҥырарга сүбэлиир.
“Лидер-Медицина” медицина киинин кылаабынай бырааһа, инфекционист Евгений Тимаков “Арассыыйаҕа тохсунньу бастакы нэдиэлэлэригэр хамсык дьаҥар сутуллуу өрө барыан сөп” диэн сэрэтэр. Кини ону дьон уһун өрөбүллэргэ бэйэ-бэйэлэрин кытта элбэхтик алтыһалларынан, көрсөллөрүнэн быһаарар. Быраас сабаҕалыырынан, Москубаҕа быһыы-майгы тохсунньу бүтүүтүгэр эрэ бигэтийиэ, оттон дойду үрдүнэн олунньу бүтүүтүгэр оннун-тойун булуо.
Биһиги Дьокуускайбытыгар бу күннэргэ ыарыы хаптайбыт курдук эрээри, Саҥа дьыл иннигэр маҕаһыыннарга, ырыынактарга халыҥ уочараттар аҕыйах күнүнэн дьиэлийэн тахсар буолуохтаахтар. Ким бэйэтин уонна чугас дьонун харыстыыр – элбэх киһи тоҕуоруһар сирдэрин тумна сатааҥ. Доруобуйа сылыгар чэгиэн-чэбдик буолуҥ!
- 0
- 0
- 0
- 0
- 0
- 0