“Хамсык дьаҥа чугуйан эрэр”, -- диир миниистир. Ол гынан баран, миэдиктэр кэтэбиллэригэр билигин даҕаны 800 тыһ. киһи баарын умнарбыт сатаммат. Биэдэмэстибэ баһылыга эрдэ бу дьаҥы утары охсуһууга олунньу уонна кулун тутар ыйдар дойду үрдүнэн быһаарыылаах буолуохтарын ыйбыта.

Роспотребнадзор хотуна Анна Попова саныырынан, хамсык дьаҥа сааһыары хаптайыан сөп. “Ону бу дьаҥ салгынынан тарҕанар буолан дьыл кэмиттэн тутулуктааҕынан быһаарыахха син эрээри, дьон санитарнай ирдэбиллэри тутуһар буолбуттара уонна быһыыны биэрии күргүөмнээхтик саҕаламмыта сабыдыаллаабыттара саарбаҕа суох. Дойду олохтоохторун 20-25 бырыһыаннара ыарыыны утарсар кыахтаннылар. Ити ыалдьан үтүөрбүт уонна быһыы ылбыт дьон. Онон ыалдьа иликтэр быһыы ылыах тустаахтар”, -- диир кини.

Оттон Роспотребнадзор Эпидемиологияҕа научнай-чинчийэр киинин дириэктэрин солбуйааччы Александр Горелов этэринэн, хамсык дьаҥар хаптара сылдьыбыт дьон күһүҥҥэ диэри быһыы ылымыахтарын сөп.