“Бээтинсэттэн, олунньу 12 күнүттэн, маасканы булгуччу кэтэри ирдээбэт буолуохпут”, -- диир Бречалов. Кини итини өрөспүүбүлүкэ үгүс олохтооҕо хамсык дьаҥар сутуллан ыалдьа сылдьыбытынан быһаарар. Ол гынан баран, ыалдьа илик уонна хамсыгы утары быһыы бастакы эбэтэр иккис компоненнарын ылбыт дьон харыстанан, уопсастыбаннай миэстэлэргэ, ол иһигэр тырааныспарга, маҕаһыыннарга, тыйаатырдарга мааскалаах сылдьалларыгар сүбэлээтэ. Маҕаһыыҥҥа киирдэххэ, күн устата элбэх киһилиин алтыһар атыылааччы мааскалаах туран үлэлиирэ ордук буолуоҕун санатта.

Удмуртияҕа ону тэҥэ бүгүҥҥүттэн, олунньу 10 күнүттэн, уопсастыбаннай аһылык тэрилтэлэрин, тыйаатырдар уонна киинэ тыйаатырдарын үлэлэригэр олохтоммут хааччахтары устуохтара. Спорт саалаларыгар 65-тэн аҕа саастаахтартан уратылар дьарыктаналларын көҥүллүөхтэрэ, онуоха саала аҥаарыттан ордуга суох дьонноох буолара ирдэнэр.

 Бу эрэгийиэҥҥэ тохсунньу бүтүүтүттэн хамсык дьаҥар сутуллуу түбэлтэтэ тосту намтаабыта. Ол курдук, тохсунньу 21 күнүгэр 190 саҥа ыалдьыбыт киһи бэлиэтэммит буоллаҕына, олунньу 2 күнүгэр 90 киһи ыалдьыбыта. Манна дьаҥ саҕаланыаҕыттан ыарыы 26,4 тыһ. түбэлтэтэ бэлиэтэннэ, ол иһигэр 541 киһи өрүттүбэтэ.

Санатан эттэххэ, Арассыыйаҕа маасканы кэтии эрэсиимэ 2020 сыл алтынньы 28 күнүттэн киллэриллибитэ. Бырабыыталыстыба бэрэссэдээтэлин солбуйааччы Татьяна Голикова дойду бары эрэгийиэннэригэр маасканы кэтии булгуччу ирдэниллэрин эппит буоллаҕына, доруобуйа харыстабылын миниистирэ Михаил Мурашко мааска эрэсиимин эрэгийиэн былааһа бэйэтэ быһаарыахтаах диир. Ити эрээри, вирусологтар маасканы уонна бэрчээккэни кытта “быраһаайдарга” эрдэ диэн санаалаахтар, муҥ сатаатар, саас бүтүүтэ устарга эбэтэр, быһыы-майгы тосту көммөтөҕүнэ, букатын даҕаны сайыннары  мааскалаах, бэрчээккэлээх сылдьарга сүбэлииллэр.