Былаас бэрэстэбиитэллэрэ холобур буолуохтаахтар

 Роспотребнадзор управлениетын дааннайынан, өрөспүүбүлүкэ үрдүнэн билиҥҥитэ 122 тыһыынчаттан тахса киһи коронавирус утары вакцинаны ылбыт. Ил Дархан бу күннэргэ ити көрдөрүүнү үрдэтэргэ сорудахтаата:

--Онуоха былаас бэрэстэбиитэллэрэ холобур буолуохтааххыт. Министиэристибэлэр уонна биэдэмистибэлэр үлэһиттэрэ бэйэҕит да быһыыгытын сүгүн ыла илик эбиккит. 19 эрэ бырыһыаҥҥыт вакцинацияламмыт. СӨ Доруобуйаҕа харыстабылын министиэристибэтэ  кэлэктиибинэн бары кэриэтэ быһыыны туруортарбыттар. Ону тэҥэ Култуурунай нэһилиэстибэ эбийиэктэрин харыстыыр департамент, итиэннэ  Нэһилиэнньэ олоҕор куттал суоһаабатын хааччыйар судаарыстыбаннай кэмитиэт үлэһиттэрин 50%-на.

Кэккэ министиэристибэлэр: Тырааныспар уонна суол хаһаайыстыбата, Инновация, цифровой сайдыы уонна инфокоммуникационнай технология, Бырамыысыланнас уонна геология, Экэниэмикэ, итиэннэ Нэһилиэнньэ дьарыктаах буолуутун судаарыстыбаннай кэмитиэтэ, Бэтэринэриийэ департамена, Тутууну уонна дьиэни-уоту кэтээһиҥҥэ судаарыстыбаннай управление, Киин быыбардыыр хамыыһыйа кэлэктииптэригэр вакцинациялааһыны маассабайдык тэрийиэхтэрин наада. Баларга 10-тан аҕыйах бырыһыаннара эрэ ылбыт. Уонна кинилэр саамай дьоннуун алтыһар, командировкаларга сылдьар, барар-кэлэр үлэлээхтэр буоллаҕа дии.  

Вице-премьердэргэ этиэм этэ, бэйэҕит сүрүннүүр хайысхаларгытыгар үлэлиир дьоҥҥут 70 %-нара вакцинацияланалларын ситиһиҥ. Тэрилтэлэргэ мобильнай пууннары тэрийиҥ. МФЦ-ларга, бааннарга, тимир суол уонна оптуобус вокзалларыгар, аэропорка, атыы-эргиэн кииннэригэр эмиэ. Бу чуолаан саамай уустук балаһыанньалаах Дьокуускайга уонна Мэҥэ Хаҥалас оройуонугар туһуланар. Куоракка микрооройуоннарга пууннары эбии аһыҥ.

Сууккаҕа 9 тыһыынча киһини

Ил Дархан бу 10 күҥҥэ тотальнай вакцинациялааһыны күүскэ ыытарга модьуйда, сууккаҕа 9000 киһини иммунизациялыырга сорудахтаата.

Ити күн киэһэ кини өссө “Саха” НКИХ ханаалынан быһа эпииргэ тахсан, өрөспүүбүлүкэ олохтоохторугар туһаайан эттэ:

--Бу муус устар ортотуттан COVID-19 дьаҥа эмиэ улаатта. Сууккаҕа сүүстэн тахса киһи сутуллар буолбута хаһыс да нэдиэлэтигэр барда. Аны, бу хамсыкпыт мутацияланан иһэрэ дьиксиннэрэр, саҥа көрүҥҥэ кубулуйар. Оҕолор үгүстүк ыалдьар буоллулар. Урукку өттүгэр итинник көстүү бэрт сэдэҕэ. Саастаахтарга олус сэрэхтээх кэм тыҥаата. Коронавирустан өлүү улаатта. Онон хааччахтыыр миэрэлэри күүһүртүм Ол, бастатан туран, өрөспүүбүлүкэ иһигэр, тас өттүгэр айаннааччылар баралларын-кэлэллэрин туттуналларыгар, вахтовиктары соҕурууттан аҕалары аччатарга туһаайылынна. Оҕо кииннэрэ, аралдьытар-сынньатар кулууптар сабылыннылар. Былырыыҥҥы курдук, локдауҥҥа тиийбэт туһуттан бу ыарыыттан харыстыыр куйахтаах буолуохтаахпыт. Онтукабыт биһиэнэ – вакцина. Билиҥҥитэ 122 тыһыынчаттан тахса киһи ылбыт. Ити кыра. Бачча босхо бэриллэр, Арассыыйабыт бэйэтин оҥоһуута препараты куттаммакка ыларгытыгар көрдөһөбүн. Быһыыны оҥорторор судургу буоллун диэн, олорор сиргитинэн көрбөккө, эрдэттэн суруйтарыыта эҥинэ суох, кэллиҥ да ылар курдук усулуобуйаны тэрийдибит. Табыгастаах буоллун диэн, дьон элбэхтик сылдьар сирдэригэр эбии пууннары арыйдыбыт. Сарсыарда 8-тан киэһэ 20.00. чааска диэри үлэлииллэр. СӨ Доруобуйаҕа харыстабылын министиэристибэтэ пууннары исписэлиистэринэн толору хааччыйарыгар эппитим. Онуоха чааһынай клиника медиктэрин, итиэннэ ХИФУ ординатордарын кыттыһыннарыахтарын наада. Ыччат министиэристибэтэ волонтердары булууга үлэлэһиэ. Олор ыйан-кэрдэн илдьэн-атааран биэрэргэ көмөлөһүөхтэрэ. Мин дьаһалта бас билэр массыыналарын мобильнай биригээдэлэри тиэйэргэ-таһарга биэрдим.  

Кыыдааннах кыһын кэнниттэн бары да сайыны олус күүтэбит. Чуолаан ыһыахпытын кэтэһэбит. Ыарыыттан сэрэхэчийбэккэ холкутук сайылыырбыт, үөрэ-көтө ыһыахпытын ыһарбыт туһугар бу күннэргэ бары вакцинацияланыаххайыҥ. Тэрилтэлэр үлэһиттэргитин көҕүлээҥ,  кэлэктиибинэн иммунитеппытын бөҕөргөтөргө кыһаллыаххайыҥ. Бары биир санаанан туруннахпытына эрэ кыайыахпыт бу сүтэн-симэлийэн биэрбэт хоруона хамсыгын.