- Сунтаар улууһун  МТ баһылыга А.В. Григорьев дьаһалынан кулун тутар  6 күнүгэр улууска коронавирус инфекцията тарҕамматын туһугар  улуустааҕы суһал штаб тэриллибитэ.  Ону тэҥэ улуустааҕы киин балыыһаҕа эпидемияны хонтуруоллуурга уонна ону утары дьаһаллары ыытарга эмиэ суһал штаб тэриллибитэ, эпидемияны утары тэрээһин үлэлэр былааннара оҥоһуллубута. Инфекционнай отделениеҕа коронавирус инфекциятынан ыалдьыбыт дьону эмтииргэ анаан 20 куойка, ол иһигэр 6 интенсивнэй эмтээһин палатата , итиэннэ 33 куойка терапия отделениятыгар бэлэмнэниллибитэ. Балыыһаны медицинскэй оборудованиенан хааччыйыыга, ол иһигэр тыҥаны искусственнай  вентиляциялааһын  уонна пульсометрия аппарааттарыгар, коронавируһу утары эмтэргэ, дезинфекциялыыр средстволарга  наадыйыы туһунан сайаапка оҥоһуллубута. Ыарыһахтары таһыыга туһунан автотранспорт  анаммыта. Эмп үлэһиттэрин инфекцияттан сэрэтиигэ, диагностааһыҥҥа уонна эмтээһиҥҥэ  бэлэмнээн үөрэтии, инструктаж ыытыллыбыта.  Быраастар уонна орто медперсонал идэлэрин үрдэтии быһыытынан  «Коронавирусная инфекция» диэн  дистанционнай курсу барбыттара. Коронавируска уорбаланар дьонтон анализтары сөптөөхтүк ылыыга уонна олору сэрэхтээхтик Дьокуускайга лабораторияҕа ыытыыга бэрэбиэркэлээһин ыытыллыбыта.

Инбэлииттэри, бэтэрээннэри  босхо ырысыаптарынан,  эминэн-томунан хааччыйыыга учаастактар терапевтарын, социальнай үлэһиттэри уонна волонтердары кытта үлэ тэрилиннэ. 65 саастарынын ааспыт  дьон ыарытыйар түбэлтэлэригэр  дьиэлэригэр тиийэн көрөргө биригээдэлэр ананнылар.

Доруобуйа харыстабылын эдэр быраастара кыттыылах «Саҥа тыын» диэн волонтердар бөлөхтөрө үлэлээн эрэр.

Билигин улуус балыыһаларыгар эбии 5 ИВЛ аппараата, инфекционнай отделениеҕа кислород тардыллыыта, эмчиттэргэ аналлаах мааскалар, ачыкылар, респиратордар, противочумнай көстүүмнэр наадалар. Итиниэхэ сайаапка Доруобуйа харыстабылын министиэристибэтигэр ыытыллан турар.

Муус устар 22 күнүнээҕи туругунан Кутана нэһилиэгиттэн түөрт биэрэстэлээх сиргэ баар РНГ АТ вахтовай бөһүөлэккэ анализ түмүгүнэн коронавирус түбэлтэтэ көстүбүтэ. Онон вахтовай бөһүөлэк билигин изоляцияҕа олорор.  69 үлэһит анализ туттарда, олортон 17 Кутана нэһилиэгин олохтоохторо. Анализтары куоракка ыыппыттара, түмүктэрин күүтэбит. Билигин уон ыалдьыбыт киһи Сунтаарга инфекционнай  отделениеҕа эмтэнэллэр.

 Сунтаардааҕы  технологическай колледж базатыгар  73 куойка миэстэлээх уонна Сунтардааҕы уопсай үөрэхтээһин анал коррекционнай оскуола – интэринээтигэр  34 куойкалаах обсерватордар тэрилиннилэр. Билиҥҥи туругунан онно ким да киирэ илик. Ол эрээри колледжка баар обсерватор наадалаах оборудованиенан уонна үлэһиттэринэн хааччылынна.

Биһиги улууспутугар 4 аптека баар, олортон  28 №-дээх аптека  23 нэһилиэккэ филиаллардаах. Бүгүҥҥү туругунан аптекалар антисептиктэртэн уонна мааскалартан ураты наадалаах эминэн хааччыллыылаахтар.

Билигин 117 ыччат волонтердуур. Кинилэр көмөлөрүгэр наадыйааччылартан  374 сайаапка киирбитэ барыта тороруллубута. Волонтердар нэһилиэнньэҕэ вирустан сэрэтэр үлэни ыыталлар, анал листовкалары, буклеттары тарҕаталлар,  кырдьаҕас уонна соҕотоҕун олорор дьоҥҥо дьиэлэригэр эми-тому, бородуукталары тиэрдэллэр, хаһаайыстыбаларыгар көмөлөһөллөр. Итини тэҥэ кинилэр 1450 маасканы тигэн наадыйааччыларга тиэртилэр.

Улуус өттүттэн медицинскэй мааскалары ылыыга үп-харчы керүллэн, бу күннэргэ атыыга тахсыахтара. Икки ИВЛ аппараатын атыылаһарга 4 мөл. 800 тыһ. солк. дуогабар түһэрсилиннэ. 28 №-дээх аптека  ХЭТ эминэн хааччыйарыгар 1 мөл. солк. бэрилиннэ. Улуус резервнэй фондатыттан 1 мөл. 201 тыһ. солк. 41 бесконтактнай термометр, анал медицинскэй көстүүмнэри тигиигэ уонна фильтр матырыйаалларын  атыылаһарга ороскуоттанна.

Бу ыарыыны утары охсуһарга  “ВИД”, “Сунтаравтодор” ХЭТ, СК “Профстрой”, “Сунтарцеолит” ХЭТ, ИП “Герасимова Н.П.”, ИП “Львова Н.Г.”, ИП “Герасимова Е.В.”, ИП “Егоров Г.С.”, “Кемпендяйская солевая компания”, “Дабанстрой” ХЭТ   уонна да атын урбаанньыттар үбүнэн көмө оҥордулар, маны таһынан общественнай  түмсүүлэр дьоҥҥо босхо мааска, аһылык набордарын  түҥэтэн күүс-көмө буола олороллор.

Муус устар 28 кунугэр  улуус депутаттарын сессиятыгар бюджеккэ уларытыылары көрүөхпүт, манна резервнэй фонда харчытын эбии, ИВЛ аппаараты атыылаһыыга үп көрүү, урбаанньыттарга К2 коэффициены 0,05 % аччатыы итиэннэ сир арендатын төлөбүрүгэр уларытыыны киллэрии боппуруостара көрүллүөхтэрэ.