Ил Дархан Айсен Николаев өрөспүүбүлүкэ сиригэр-уотугар коронавирус сыстыганнаах ыарыы тарҕаныытын утары охсуһууга туһаайыллыбыт хааччахтыыр дьаһаллары 2020 сыл ыам ыйын 31 күнүгэр диэри уһатта.

Оройуоннар сирдэрин-уоттарын уонна тырааныспарга тииһиниини, онон сибээстээн  коронавирус тарҕаныытын таһыма арааһын учуоттаан, сылы эргиччи массыынанан сибээстэһиилэрэ суох өрөспүүбүлүкэ нэһилиэнньэлээх пууннарын сирдэригэр-уоттарыгар бары хааччахтааһыннар уһуллаллар. Ол курдук, сынньатар, аралдьытар, көрдөрөр, култуурунай, спортивнай, быыстапкалыыр, сырдатар, рекламалыыр уо.д.а. 50-тан тахса киһи кыттар тэрээһиннэриттэн ураты бары тэрилтэлэр уонна биирдиилээн предпринимателлэр үлэлэрэ көҥүллэнэр.

Саха Өрөспүүбүлүкэтин Ил Дарханын Ыйааҕынан, ыам ыйын 12 күнүттэн Алдан куорат уонна Алдан оройуонун Ленинскэй бөһүөлэгин  сирдэригэр-уоттарыгар  карантин тохтотуллар. Итини сэргэ Алдан оройуонун сиригэр-уотугар дьиэҕэ олоруу (самоизоляция) режимэ хаалар.

Хаҥалас улууһун Покровскай куората туһааннаах Ыйааҕынан эбии хааччахтыыр дьаһаллар олохтоммут сирдээх-уоттаах муниципальнай тэриллиилэр кэрискэлэригэр киллэрилиннэ. Ыйаах быһыытынан, дьиэҕэ олоруу режимэ Дьокуускай куоракка, Жатайга, Аллараа Бэстээххэ, Тиксиигэ, Нерюнгрига, Мииринэйгэ, Ленскэйгэ, Покровскайга уһатыллар. Маныаха бу сирдэргэ ательелар, химчисткалар, атах таҥаһын өрөмүөнүн оҥорор тэрилтэлэр үлэлэрин саҕалыахтара. Ол аата олох-дьаһах өҥөлөрүн оҥорооччулар клиеннэри кытта быһаччы сибээһэ суох, булгуччу мааскалары уонна бэрчээккилэри туһанан үлэлиэхтээхтэр. Ону таһынан, салгыҥҥа бэйэ спордунан дьарыктаныыта, маны сэргэ атын гражданнартан биир миэтэрэттэн итэҕэһэ суох тэйиччи дьиэ кэргэн күүлэйдиирэ көҥүллэнэр.

Өрөспүүбүлүкэ атын муниципальнай тэриллиилэрин сирдэригэр-уоттарыгар эргиэн кииннэрэ, эргиэн комплекстара, дьаарбаҥкалар, ырыынактар, парикмахерскайдар, косметическай салоннар, кииннэр үлэлэрэ эрдэттэн суруйтарыынан өҥөнү оҥоруу быһыытынан көҥүллэнэр. Дезинфекцияны ыытыыга анаан клиеннэр икки ардыларыгар бириэмэ хаалыахтаах. 

Оттон үөрэх сыла түмүктэниитин таарыйдахха, бигэргэммит графикка сөп түбэһиннэрэн, начальнай уопсай, сүрүн уопсай, орто уопсай үөрэхтээһин, орто профессиональнай үөрэхтээһин, эбии үөрэхтээһин уонна спортивнай бэлэмнээһин тэрилтэлэригэр үөрэнии болдьоҕо 2019/2020 үөрэх сыла түмүктэниэр диэри уһатылынна, диэн Саха сирин баһылыгын уонна бырабыыталыстыбатын пресс-сулууспатыттан иһитиннэрдилэр.