Ситэри тутуллубатах дьиэлэргэ сыһыаннаан сөптөөх быһаарыыны булар туһугар өрөспүүбүлүкэ сокуоннара ситэриллэн-хоторуллан биэриллэллэр. 2012 сыл кулун тутарыгар тутааччылар эбээһинэстэрин толорботохторуттан эмсэҕэлээбит дьоҥҥо судаарыстыбаннай көмө миэрэтин туһунан сокуон тахсыбыта.

2012-2015 сс. «Социальная инициатива», «Строим вместе», «Новострой», «Промстройресурс»,  «ПРИТ», «Просвещение», «Промстрой комплект», «Эркин-инжиниринг» тутуу тэрилтэлэриттэн өлүүлээн тутууга албыннаппыттарга өрөспүүбүлүкэ бүддьүөтүттэн уопсайа 233,3 мөл. солк. көрүллүбүт.  

2019 сылга өрөспүүбүлүкэ бүддьүөтүттэн “хос-хос атыылааһынтан” эмсэҕэлээбит 31 киһи уопсайа 37 мөл. солк суумаҕа компенсация ылбыт. Бу сыл ахсынньы ый түмүктэниэр диэри 40 киһи маннык төлөбүрү ылыаҕа, уопсайа 50,1 мөл. солк. суумалаах.

Бүтэһик 4 сыл иһигэр өлүүлээн тутууга албыннаппыт дьон быраабын көмүскээһиҥҥэ биэдэмэстибэлэр икки ардыларынааҕы үлэ чуолкайданан көдьүүстээх систиэмэ оҥоһулунна. Уһун сылларга тутуллар эбийиэктэргэ сыһыаннаан “дорожнай карта” оҥоһуллан, эбийиэк ситэри тутуллар бэрээдэгэ олохтоммут.

Бу кэм иһигэр өлүүлээн тутууттан эмсэҕэлээбит 963 дьиэ кэргэн бырааба көмүскэммит. Болдьоммут кэмигэ тутуллан бүппэтэх элбэх кыбартыыралаах 15 дьиэ үлэҕэ киирбит.

Билиҥҥи туруган кыһалҕалаах эбийиэктэр биир кэлим реестэрдэригэр 9 тэрилтэтэ тута сылдьар элбэх кыбартыыралаах 15 дьиэтэ киирбит. Кинилэри кытта 1174 киһи кыбартыыраҕа дуогабар түһэрсибит. Бу дьон быраабын көмүскүүргэ тутааччылар сири туһанар докумуоннара суоҕуттан харгыстанар.