Баайаҕа нэһилиэгин баһылыгын солбуйааччы Анна Афанасьевна Николаева:
--Бу “Ньургуһун” уһуйаан таас дьиэтэ 2014 сылтан тутуллан, бүгүн үлэҕэ киирэр үөрүүлээх тэрээһинэ буолла. Аһыллыытыгар үөрэх миниистирин бастакы солбуйааччы И.П. Любимова, Ил Түмэн дьокутааттара Я.А. Ефимов, И.И. Данилов, улуус баһылыга М.М. Соров кэлэн эҕэрдэлээтилэр.
Бастаан бу тутуу нэһилиэнньэ бэйэбит көҕүлээһиммит быһыытынан саҕаламмыта. Бырайыагар олохтоох дьоммут, биир дойдулаахтарбыт, тэрилтэлэрбит, урбаанньыттарбыт, түмсүүлэрбит, уустарбыт үп-харчы кыттыспыттара. Үс мөлүйүөн кэриҥэ харчыны хомуйан оҥорторбуппут. Онно Иван Михайлович Андросов өҥөтө улахан. Ону сэргэ "Байаҕантай" ТХПК бэрэссэдээтэлэ С.Н. Андросов үбүнэн-аһынан улаханнык көмөлөспүтэ. Иван Степанович Андросов салайааччылаах "Якутпроект" тэрилтэ бырайыагын оҥорбута.
Оскуола тутуутуттан хаалбыт матырыйааллары эбиискэ оҥостон, Яков Ананьевич Ефимов салайааччылаах “Северный дом” ХЭТ бэйэтин үбүнэн тутан саҕалаабыта. Ону Андрей Лукич Данилов “Туймаада строй” тэрилтэтэ салҕаан, тиһэҕэр тиэртэ. Билигин үбүлээһинэ быһаарылынна – “Демография” национальнай бырайыак чэрчитинэн харчыта көрүллүөҕэ.
Былырыын 2020 сылга ытыктыыр киһибит Мандар Уус 75 сааһын туолбута. Онон сибээстээн бырабыыталыстыбаннай хамыыһыйа тэриллибитэ. Ол хамыыһыйа уонна улууспут салалтатын, Ил Дархан быһаччы өйөбүллэринэн, итиэннэ Борис Федорович Неустроевтаах буоламмыт, Баайаҕаҕа кэлиҥҥи кэмҥэ элбэх тутуу ыытылынна.
Бу оҕо саада үлэҕэ киирэригэр саамай көмөлөспүт киһинэн Ил Түмэн дьокутаата Яков Ефимов буолар. Кини араас таһымнаах мунньахтарга туруорсан, бырайыагар бэйэтэ үп эбэн, кэпсэтиһэн, билигин оҕолорбут сиэдэрэй дизайннаах, аныгы ирдэбилгэ толору эппиэттиир бэртээхэй дьыссааттаннылар.
Манна даҕатан эттэххэ, биһиги үөрэтэр-иитэр кыһаларбыт холбоһон, бу сылтан ыла оскуола-саад диэн буолла. Онон иккиэннэригэр дириэктэр Степан Петрович Старостин.
- 0
- 0
- 0
- 0
- 0
- 0