Бастакы сыбаайаны түһэрэр үөрүүлээх түгэҥҥэ СӨ Бырабыыталыстыбатын бэрэссэдээтэлин I солбуйааччы Кирилл Бычков сырытта:
--Бу аныгы ирдэбилгэ толору эппиэттиир, тупсаҕай оҥоһуулаах түөлбэ буолуоҕа. Барыта 66 хаачыстыбалаах дьиэ дьэндэйиэҕэ. Киин куораппыт соҕуруу диэки тэнийэн, кэҥээн биэриэҕэ, ыал бөҕө саҥа дьиэлэнэн үөрүөҕэ. Маннык улахан кыбаарталы тутуу өрөспүүбүлүкэҕэ сонун көстүү буолар, онон Уһук Илин бүттүүнэ кэтээн көрүөҕэ. Арассыыйа Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев бу тутууну өйөөтө. Инникитин дьиэлэри биирдиилээн тутартан аккаастанан, маннык бүтүн кыбаарталанан дьэндэтэр буолуохпут, -- диэтэ.
«Звезднай» микрооройуон дьиэлэрэ үрдээбитэ 9 мэндиэмэннээх буолуохтара. Эһиил 2022 сылга «Дьиэ-уот» национальнай бырайыак чэрчитинэн, хаарбах туруктаах дьиэлэртэн көһөрүү бырагырааматынан, 25,5 тыһ. кв. м иэннээх 7 олорор дьиэ үлэҕэ киириэҕэ. Тутуу кэлиҥҥи түһүмэхтэрин 2027 сылга диэри олоххо киллэр сорук турар.
Манна икки дьыссаат уонна икки оскуола баар буолуоҕа. Бэлисипиэтинэн уонна сатыы сылдьарга анал суоллар, дьаарбайарга бульвардар, аллеялар уонна былаһааккалар, сквердэр оҥоһуллуохтара. Күөл кытыытын тупсарыахтара.
- 0
- 0
- 0
- 0
- 0
- 0