Миниистир Саха сирин доруобуйатын харыстабылын үлэтин хайҕаата: "Пандемия кэмигэр нэһилиэнньэҕэ медицинскэй көмөнү  оҥорууну үрдүк таһымҥа тэрийдигит", -- диэтэ. Онуоха Айсен Сергеевич: «Коронавируһу олоччу кыайдыбыт диир кыахпыт суох эрээри, балаһыанньа биллэ тубуста. Саастан ыла барыта биэс тыһыынчаттан тахса киһи ыарыйда. Күн бүгүн  1 158  киһи эмтэнэр. Бу пандемия COVID-киин наадатын көрдөрдө. Дьокуускай куоракка 245 миэстэлээх инфекционнай балыыһаны тутар сорук турар. Аны туран, Национальнай медицинскэй кииммитин саҥардыахпытын баҕарабыт. 1993 сыллаахха тутуллубута. Сылга ортотунан 100 тыһ. кэриҥэ киһи манна көрдөрөр. Сүүрбэ тыһыынча ыарыһах балыыһаҕа сытан эрэ эмтэнэр. Уон икки тыһыынчаттан тахса араас уустук эпэрээссийэ, үс мөлүйүөн анаалыс оҥоһуллар. Икки тыһыынча оҕо төрүүр. Өрөспүүбүлүкэҕэ маннык улахан суолталаах кииммитин өрөмүөннүүргэ, саҥа аппарааттары ыларга "Уһук Илини 2024 сылга диэри сайыннарыы" Национальнай бырагыраама чэрчитинэн федеральнай бүддьүөттэн харчы көрөн өйүүргүтүгэр көрдөһөбүн. Билэргит курдук, Саха сирин иэнэ олус киэҥ. Ыраах сытар нэһилиэктэр суоллара-иистэрэ мөлтөх, көтөр аалынан эрэ тиийэҕин. Ол иһин телемедицинаҕа уонна санавиацияҕа, итиэннэ кыра кээмэйдээх устар ааллары ыларга эбии харчы көрөргүт буоллар. Ол суһал көмөнү оҥорорго эрэ тоҕоостоох буолуо суоҕа этэ, диспансеризацияны ыытарга, нэһилиэнньэни көрө, быраастар кэлэллэригэр эмиэ табыгастаах», — диэтэ.