Бөһүөлэктэн 8 килэмиэтирдээх, уруккута “Сарыал” ыччат-хомсомуол пиэрмэтин сиригэр, кырдьаҕас Мараҕа сайылыкка бэс ыйын 11 күнүгэр кэлбиттэр. Кэпэрэтиип салайааччыта Маргарита Скрябина. Үлэлиир састаап уруккутунан: биригэдьиир Екатерина Ноговицына, ыанньыксыттар Наталья Сотникова уонна Николай Жерохов, осеменатор Маргарита Катакинова, үүт учуоттааччы Яна Васильева, бостуук Иван Стручков буолан үлэлииллэр. Барыта 87 ынаҕы ыыллар.

Сарсыарда 6 чаастан сайылыкка ыам саҕаланан, сиэмэн муосталаах эргэ титииккэ ыыр аппараат үлэлээн ньиргийэр. Күҥҥэ 6 сэнтиниэр курдук үүтү ыыллар.
Нэһилиэк дьаһалтата сайылыкка тиэрдэр суолу туох кыалларынан оҥоро сатыыр. Шлагы кутан бырыы-бадараан өттүн кытаатыннара сылдьаллар. Үүттэрин “Хоту” кэпэрэтиип массыыната күн өрүү-өрүү кэлэн ылар уонна Балыктаахха бэйэтигэр үлэлиир үүт собуотугар аҕалан кутар.

Үлэһиттэр хамнастарын төһө үүтү ыабыттарынан аахсаллар.
Маргарита Ивановна өҥө иһин ылар харчытын барытын кэриэтин хамнас оҥорорун этэр. Кэпэрэтиипкэ, бэйэтин ааҕан туран, 11 киһини хамнастыыр.

Өҥө төлөбүрэ төһөнүй?

Биир ыйга:
ынахха – 1500солк.,
тыһаҕаска, тиҥэһэҕэ – 1300 солк.
борооҥҥо, ньирэйгэ – 1100солк.,
субаҥҥа – 650солк.

Отунан хааччыйыыга ынахха 2 туонна, ыччат сүөһүгэ 7 сэнтиниэр оту ирдиир. Ол гынан, 7 сэнтиниэр кыстыкка тиийбэтэх. Субаҥҥа 3 үлэһит үлэлиир.
Холобур, ньирэй көрүүгэ 1100 солкуобайы ылбытыттан 700 солкуобайын хамнаска, 400 солкуобайын хаһаайыстыба туһатыгар тыырар.

Үлэһиттэр от үлэтин түмүктээтэхтэринэ, өрөмүөн үлэтэ саҕаланыахтаах. Кооператив 77 га оттуур сирдээх, онтон 50-чэ туонна оту ылар. Маныаха эбии от 50% дьонтон ылар. Быйыл от үүнүүтэ ити эҥэр мөлтөх. Ноговицыналаах 21 оту ылар алаастарыттан 7 эрэ кэбиһиини ылбыттар. Чурапчы улууһун Чыаппаратын кыраныыссатын диэки, 40-ча килэмиэтирдээх сиргэ баран оттууллар.

«Хаххах» кэпэрэтиип курдук хаһаайыстыбалары ханнык баҕарар нэһилиэк тэриниэн сөп.