Комплексы “Агрохолдинг Туймаада” өрөспүүбүлүкэ инвестициятын бырагырааматынан тутуллубут. Саҥа тутуу хааччыллыыта аныгы: сылытыллар, сырдатыллар ситим тардыллыбыт, сүөһүлэргэ уу кутар оборудование, механическэй ыыр тэрил, ноһуому ыраастыыр, үүтү сойутар аппарат баар. Дьаһалта хонтуоратын уонна үлэһиттэр сынньанар хоһун оҥорбуттар. Комплекска 172 сүөһү, ол иһигэр 52 ыанар ынах туруоҕа.

Саҥа комплекс аһыллыбытынан олохтоохтору СӨ тыа хаһаайыстыбатын миниистирэ Александр Атласов эҕэрдэлээтэ. Кини Таастаахха тутуллубут комплекс өрөспүүбүлүкэҕэ үлэлээбит иккис комплекс буоларын туһунан эппит. Ол туһунан министиэристибэ пресс-сулууспата иһитиннэрэр. 2018 сыллаахха Эбээн Бытантайга “Бытантай” хаһаайыстыбаҕа 120 төбө турар саҥа комплекс үлэлээбитэ. Кэлэр сылларга Горнай, Үөһээ Бүлүү, Амма улуустарыгар бу курдук аныгылыы  комплекстар тутуллалларын былаанныыллар.

Бүтэһик 5 сыл устата саха боруода сүөһүтүн ахсаана 1,5 төгүл улааппыт уонна 2 тыһ. төбөҕө тиийбит. Ол онтон 760 төбө генофонд питомниктарыгар бааллар, 555 төбө – улахан хаһаайыстыбаларга, 585 төбө – бааһынай хаһаайыстыбаларга. 2024 сылга диэри саха боруода суөһү ахсаанын 3 тыһ. төбөҕө диэри тиэрдэр сорук турар.