--Бу сокуон сэтиньи 10 күнүгэр XXI  (уочараты таһынан) пленарнай мунньахха ылыллыбыта. Онтон бэйэбит кэмитиэппитигэр ырытыһан баран, уларытыылары киллэрэргэ быһаарбыппыт, -- диир Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин. – Барыта 9 көннөрүү киирдэ. Итинтэн алтатын биһиги кэмитиэппит көтөхпүтэ, эрэдээксийэлиир соруктаах. Үһэ -- «Сиэрдээх Арассыыйа» фракциятыттан.

Бу фракция салайааччыта Юрий Григорьев кинилэр баартыйаларын этиилэрин өйөөбүттэрин иһин норуот дьокутааттарыгар махтанна.

Санатар эбит буоллахха, Ил Дархан Айсена Николаев СӨ Бырабыыталыстыбатыгар туһаайан эппит Илдьитигэр 2021 сылтан тыа хаһаайыстыбатын оҥорон таһаарааччыларыгар бэриллэр субсидияҕа уларытыылары киллэрэргэ сорудахтаабыта. Ол курдук, ынах сүөһү төбөтүгэр сылга 35 тыһыынча солк. төлөнөр буолар, оттон тэрээһиннээх хаһаайыстыбалар лиитэрэ үүтү 50 солк. туттарар буолуохтара.

Парламентарийдар тустаах сокуон бүтэһиктээх ааҕыытыгар бары көннөрүүлэрин ылыннылар.

Бу сокуон РФ Бүддьүөтүн кодексын 140 ыстатыйатын ирдэбилигэр сөп түбэһиннэрэн оҥоһулунна. Сокуон 1 ыстатыйатыгар “туораахтаах култуура производствотын хааччыйыы” диэни эбэн биэрдилэр. Саҥа тэриллибит Аартыканы сайыннарыы уонна хотугу норуоттар дьыалаларыгар министиэристибэ балык хаһаайыстыбатын сүрүннүүрүгэр этилиннэ. Тыа хаһаайыстыбатын өйүүргэ туһуламмыт субвенцияны үллэрии механизмын, итиэннэ сүөһүнү, сылгыны, сибиинньэни, табаны иитиигэ, оҕуруот аһын, туораахтаах бурдугу үүннэриигэ, кэтэх хаһаайыстыбаны сайыннарыыга оҥоһуллар өйөбүллэри чопчулаатылар.