Быйыл улууска тыа хаһаайыстыбатын бары култуураларын ыһыы иэнэ 5 174 гектарга тэҥнэһиэҕэ. Онтон аҥаарыттан ордуга – 2 807 гектар – сүөһү аһылыгар ананар. Бу ааспыт сыллааҕар 38 гектарынан элбэх.

Ол эрээри туораахтаах култуураларга ыһыы иэнэ аччаабыт: ааспыт сылга 1 801 гектар эбит буоллаҕына, быйыл 1 532 гектар. Ити туохтан төрүөттээҕий? Улууска тыа хаһаайыстыбатын бөдөҥ тэрилтэлэриттэн биирдэстэрэ -- «Туймаада» экоферма (соторутааҕыта «Нөмүгү» агрофирма» диэн ааттанара) быйылгыттан ыла сүөһү аһылыгар ананар култуураларынан эрэ дьарыктанарга быһаарбыта.

Хортуоппуйу уонна аһаҕас буорга оҕуруот аһын олордуу ааспыт сыл таһымыгар хаалыаҕа – туһааннааҕынан 700 уонна 135 гектар.
Улуус хаһаайыстыбаларыгар сиэмэ хортуоппуйу «Наука» ХЭТ хааччыйыаҕа. Ол курдук, ити тэрилтэ Саха сиринээҕи тыа хаһаайыстыбатын научнай-чинчийэр институтун кытта улуус хаһаайыстыбаларыгар батарыыга анаан 62 тонна Супер Элита сиэмэ хортуоппуйу бэлэмнээтэ. Онуоха эбии 10 тоннаны чааһынай дьоҥҥо батарыахтара.

Тыа хаһаайыстыбатын департамена иһитиннэрбитинэн, сааскы хонуу үлэлэрэ хойутаабакка ыам ыйын бастакы декадатыгар саҕаланыахтара.