Отуттан тахса сыл буолан баран, аан бастаан 2020 сыллаахха Үөһээ Дьааҥы улууһун аҕа баһылыга Гаврил Чириков, тыа хаһаайыстыбатын управлениетын начаалынньыга Дмитрий Габышев уонна ЯНИИСХ дириэктэрэ, РАН чилиэн-кэрэспэдьиэнэ Леонид Владимиров сүбэлэһэн,  кормопроизводство лабораториятын кытта дуогабар түһэрсэннэр, Үөттээх уонна Эргэ Остуолба диэн сирдэргэ уопсайа 3 гектарга эбиэһи күөх маассаҕа ыстылар.

 Бу экспериментальнай үлэни олохтоох эдэр ыччат В.М. Горохов, Остуолбаҕа тыа хаһаайыстыбатын исписэлииһэ Н.Н. Горохов, учуонайдар Х.И.Максимова, В.С.Николаев ыыттылар. Остуолба нэһилиэгин Улахан Сыһыы диэн сиригэр буору уонна от састаабын учуонайдар С.А.Павлова, Е.С.Пестерева, Г.Е.Захарова чинчийдилэр. Бу сиртэн 6 туонна күөх маассаны биир гектартан илиинэн охсон хомуйдулар.

 2021 сыллаахха СӨ Тыа хаһаайыстыбатын министиэристибэтин судаарыстыбаннай хантараагынан ЯНИИСХ Дьааҥы улууһугар ыһыы үлэтин саҥа тэриллибит «Бадайагро» тэрилтэҕэ сүктэрбитэ (дириэктэр В.М.Горохов, тэҥ бырааптаах учредителлэр Вадим, Николай, Иннокентий Гороховтар).

Быйыл "Бадайагро" Дьааҥы улууһун дьаһалтатын көмөтүнэн сир хорутар суха, ыарахан диискэ уонна кыра кэтиттээх сеялка атыыласта. Онон эбиэс ыһыыта кэҥээн, 10 гектарга ыытылынна.

Саҥа сирдэри таҥастыырга саҥа тэриллибит тэрилтэҕэ күүстээх кыамталаах тыраахтар, фреза культиватор, каток, о.д.а. анал тиэхиньикэлэр наадалар. Үүнүү көрдөрүүтэ үрдүк, ортотунан эбиэс үрдүгэ 100-140 см. Сиэмэлэрин ЯНИИСХ нөҥүө Уус Алдан Дүпсүн нэһилиэгин Д.Д. Илларионов хаһаайыстыбатыттан ылбыттара. Онон ЯНИИСХ селекционер-учуонайдара  таһаарбыт  “Покровский-9” диэн оройуоннаммыт суортарын ыстылар. Биир гектар иэннээх сиртэн 6-7,5 туонна күөх масса кэлэрэ күүтүллэр. Ыһыы, хомуур үлэтин анал тиэхиньикэ суоҕа бытаардар.

Учуонайдар итини таһынан Саха сиригэр 5 көрүҥ оройуоннаммыт уонна соҕурууттан кэлии элбэх сыллаах оттору лиман систиэмэтигэр уонна хоту тыйыс айылҕа усулуобуйатыгар үрдүк сиргэ олортулар, хайдах үүнэрин кэтээн көрүү үлэтэ 3,5 гектардаах сиргэ саҕаланна.

Былаан киэҥ. Улахан Сыһыыга уоҕурдуу киллэрээһинэ, соҕурууттан биир сыллаах саҥа оттору аҕалан ыһан, тыйыс усулуобуйаҕа хайдах үүнэрин үөрэтии.