Бу киэҥ далааһыннаах мунньахха Халыма-Индигир 34 №-дээх быыбардыыр уокуруктан норуот дьокутаата Сахамин Афанасьев, улуустааҕы тыа хаһаайыстыбатын управлениетын начаалынньыга Павел Сивцев, култуура уонна туризм сайдыытын управлениетын начаалынньыга Аксиния Сивцева, нэһилиэктэр баһылыктара уонна уопсастыбаннас кытыннылар.

Сүрүн кэпсэтии сылгыны дэлэтиигэ туһуламмыт өрөспүүбүлүкэтээҕи бырагырааманы дьүүллэһиигэ ананна.

Санатар буоллахха, 2021 сыл муус устар 26 күнүгэр Тыа хаһаайыстыбатын министиэристибэтин 286 №-дээх бирикээһэ тахсыбыта. Докумуон племенной үлэнэн дьарыктанар хаһаайыстыбалар племенной убаһаны атыылаһалларыгар судаарыстыбаннай бүддьүөттэн ороскуоттарын чааһын төннөрүүгэ субсидияны ылааччылары таларга туһуламмыта.

- Племенной убаһаны атыылаһарга субсидияҕа тиксэргэ аналлаах өрөспүүбүлүкэтээҕи бырагыраама былырыын олоххо киирбитэ, - диэн быһаарар улуустааҕы тыа хаһаайыстыба управлениетын исписэлииһэ Евдоким Кондаков. - Сылгыны дэлэтиигэ анаммыт бырагыраама чэрчитинэн племенной убаһа атыылаһыллар сыанатын 98% өрөспүүбүлүкэ уйунуохтаах. Ол эрээри убаһа атыылаһарга ирдэбил элбэх - субсидиянан туһанар баҕалаах хаһаайыстыба нолуокка, хамнас төлөбүрүгэр, кредиттэргэ иэһэ-күөһэ суох буолуохтаах. Уонна, холобур, бу иннинэ араас куонкурустарга кыттан грант, социальнай төлөбүр ылбыт хаһаайыстыба эмиэ хапсар кыаҕа суох. Итини тэҥэ куонкуруһу ааһан, кыттааччы “Сахаагроплем” тэрилтэ квотатыгар тигистэҕинэ, кини биэс сыл иһигэр атын бырагыраамаҕа кыттар быраабынан туһаммат.

Мунньахха сылдьыбыт Өймөкөөн сылгыһыттара үөһэ ахтыллыбыт бырагырааманы билсэн, дьүүллэһэн баран, биһирииллэрин биллэрдилэр. Мустубут дьон салайааччыларга, Ил Түмэн дьокутаатыгар Сахамин Афанасьевка интэриэһиргиир, ыарырҕатар араас боппуруостарын биэрдилэр, өрөспүүбүлүкэ көмөтүнэн Дьөһөгөй оҕотун ахсаанын өссө элбэтэргэ кыах үөскээбитин астына бэлиэтээтилэр.

Семен Сивцев, “Хотугу сардаҥа” хаһыат

Ааптар хаартыскаҕа түһэриитэ