Бу таҥара дьиэтэ ол үйэттэн ыла 70-с сылларга диэри хотугу эргимтэҕэ былыргы нуучча архитектуратын соҕотох туоһута буолан турбута. Онтон 1971 сыллаахха Новосибирскай Академ куоратыгар саҥа тэриллэн эрэр  историко-архитектурнай мусуойга көһөрөн илдьибиттэрэ.

Онон быйыл Спасо-Зашиверскай таҥара дьиэтэ 320 сылын туолла. Үбүлүөйдээх даатаны атырдьах ыйын 25 күнүгэр бэлиэтээтилэр. СӨ Бырабыыталыстыбатын бэрэссэдээтэлин солбуйааччы э.т. Сергей Местников, РФ Судаарыстыбаннай Думатын дьокутаата Галина Данчикова, Новосибирскайдааҕы нуучча православнай таҥаратын дьиэтин протоиерейа Андрей Баженов кыттыылаах кэмпириэнсэйэҕэ  Новосибирскайга олорор биир дойдулаахтарбыт “Саха-Сибиир” түмсүүлэрин актыбыыстара уонна РАН Сибиирдээҕи салаатын археологияҕа уонна этнографияҕа институтун үлэһиттэрэ видео-сибээс көмөтүнэн холбоннулар.

“Биир ньыгыл Арассыыйа” баартыйа «Историческая память» бырайыагын Саха сиригэр сүрүннүүр норуодунай дьокутаат Елена Голомарева, Новосибирскайга тиийэн, үөрүүлээх тэрээһиҥҥэ сырытта.  Ил Дархан Айсен Николаев аатыттан Новосибирскайга баар “Вектор-Бест” тэрилтэ медицинскэй диагностиканы оҥорор  средстволарын айан, бэлэмнээн таһаарар институтун  бастакы дириэктэрэ,  химия наукатын хандьыдаата, саха эр бэрдэ Алексей Аммосовка “СӨ доруобуйатын харыстабылын үтүөлээх үлэһитэ” бочуоттаах бэлиэни туттарда. Манна даҕатан эттэххэ, “Вектор-Бэст” коронавируһы бэрэбиэркэлиир тест-систиэмэни бастакынан атыыга таһаарбыта.

         Ааспыт олохпут кэрэһитэ, историческай пааматынньыкпытын “Саха-Сибиир” уопсастыбаннай түмсүү бэркэ көрөр-харайар. Ол патриоттар ортолоругар бааллар: Петр Портнягин, Аҕа дойду Улуу сэриитин кыттыылааҕа, үлэ уонна тыыл бэтэрээнэ Галилей Аржаков, община бэрэсидьиэнинэн үлэлээбит Тимофей Тимофеев, Иоган Максимов, ядернай физика институтун бэтэрээнэ Юрий Семенов. Кинилэргэ Елена Голомарева Ил Түмэн Махтал суруктарын туттарда.

         Үөрүүлээх тэрээһин Спасо-Зашиверской таҥара дьиэтин куолакалын тыаһынан түмүктэннэ.