Үөрүүлээх тэрээһиҥҥэ Ил Түмэн экэниэмикэҕэ, инвестицоннай уонна бырамыысыланнас бэлиитикэҕэ сис кэмитиэтин бэрэссэдээтэлэ Павел Петров, Ил Түмэн билимҥэ, үөрэххэ, култуураҕа, иһитиннэриилэри киэҥник тарҕатар ситимнэргэ уонна уопсастыбаннай дьыалаларга сис кэмитиэтин бэрэссэдээтэлэ Феодосия Габышева, норуот дьокутааттара кытыннылар.
СӨ Ил Дархана Айсен Николаев, Горнай улууһун баһылыга Никита Андреев, Софрон Данилов төрөппүт кыыһа, бөлөһүөпүйэ билимин дуоктара, ХИФУ бэрэпиэссэрэ Вера Данилова өйдөбүнньүгү сүрэхтиир бочуоттаах соругу толордулар.
“Ааптар уонна кини кэллиэгэлэрин талааннарын, энтузиазмнарын, сыралаах үлэлэрин, тулуурдарын уонна дьулуурдарын көмөтүнэн аан бастакытын ини-бии Даниловтар култуурунай уобарастара олоххо киирдэ, киэҥ араҕаҥа таҕыста”, – Вера Софроновна Данилова бэлиэтээтэ.
Бэлиэтээн эттэххэ, Дьокуускайга ини-бии Даниловтарга аналлаах өйдөбүнньүк бэлиэни туруорар туһунан бырайыагы Дьокуускай гордуматын дьокутааттара өйөөбүттэрэ. Оттон Ил Түмэн бу боппуруоһу Горнай улууһун социальнай-экэнэмиичэскэй сайдыытын дьүүллэһиитигэр көрбүтэ.
Бу пааматынньык ааптардарынан Арассыыйа үтүөлээх худуоһунньуга, П.А. Ойуунускай аатынан бириэмийэ лауреата Семен Прокопьев, кини көмөлөһөөччүтэ скульптор Данил Чучайцев, Дмитрий Постников уонна архитектор Алексей Самсонов буолаллар.
Ил Түмэн Пресс-киинин матырыйаалынан.
- 0
- 0
- 0
- 0
- 0
- 0