Андрей Борисов уус-уран салайааччылаах П.А. Ойуунускай аатынан Саха академическай тыйаатыра Саха Өрөспүүбүлүкэтин 100 сылын көрсө, саҥа сыл бастакы ыйын бастакы күнүгэр күнүс 1 чаастан Ойуунускай «Сүүс сыллаах улуу былаан» айымньытынан дьүһүйүүнү көрдөрдө.

Төһө да бырааһынньыктааҕы өрөбүл күн буоллар, тыйаатыры таптааччылар эдэрдиин-эмэнниин 200-чэкэ буолан, үбүлүөйдээх сыл бастакы тэрээһинигэр муһуннулар.

Саха тыйаатырын артыыстара Былатыан Ойуунускай «оҥоһуллан эрэр олоҥхо» диэн бэлиэтээбит айымньытыгар суруллубут чаҕылхай түгэннэри, аныгы кэм балысхан сайдыытын таба таайбыт көстүүлэрин дьон сэргэхтик ылынарын курдук дьүһүйэн көрдөрдүлэр. Түмүгэр сыанаҕа оччотооҕу дьон ыра санаата ыраах кэми чугаһатардыы, билиҥҥи кэми одуулаабыттыы, аныгы сахаттан элбэҕи эрэйэрдии олорон хаалбыт түгэннэрэ киһини дириҥ толкуйга, сырдык өйгө-санааҕа сирдээтэ.

СӨ Инновацияҕа, цифровой сайдыыга уонна инфокоммуникационнай ньымаларга миниистирэ Анатолий Семенов салалталаах «100 сыллаах сайдыы былаанын» бэлэмниир бөлөх сыанаҕа тахсан, кэм, көлүөнэ уонна сайдыы оҥкуллара быстыспат ситимнээхтэрин кэпсээтилэр. Кинилэр бары кэриэтэ улуустары кэрийэн, нэһилиэнньэни кытта атах тэпсэн олорон, бастыҥ санаалары, дьоһуннаах идиэйэлэри хомуйан, сурукка тиспиттэрэ саҥалыы 100 сыллаах сайдыы тосхолун ылынарга ордук суолталаныа, дириҥ ис хоһооннонуо.

Кэлбит ыалдьыттары Саха тыйаатырын чугас доҕоро, үгүс сылларга бары өттүнэн өйөөбүт, дириҥник чинчийбит, Ил Түмэн бэрэссэдээтэлин бастакы солбуйааччы Александр Жирков эҕэрдэлээтэ уонна, бүтүн саха норуотугар туһаайан, баҕа санаатын тиэртэ:

«Өскөтүн өрөбөлүүссүйэ иннинэ биһиги бэйэбит сахалар сойуустарын тэрийбэтэхпит, хаһыаттарбытын-сурунаалбытын, тыйаатырбытын-ускуустубабытын олохтооботохпут, 1912 с. бүтүн сахалары түмэр сийиэһи тэрийбэккэбит олорон биэрбиппит буоллар, саха уопсастыбаннай-бэлитиичэскэй өйүн-санаатын сайдыытын устуоруйата сүрдээх суххай, кудаххай буолуо этэ. Онон, бастатан туран, саҥа кэм дьоно саха бастакы интэлигиэнсийэтигэр махнатыах тустаахпыт. Салгыы сайдыы иннигэр түһэр соругу туруоран, кимэн киириилээх үлэни-хамнаһы тэрийиэхтээхпит».

Дьэ, ити курдук кэлбит ыалдьыттар айымньылаах үтүө санаалары истэн, алгыс тыллары ылынан, Саха тыйаатырыттан: «Дойдум туһугар үлэлиэм-хамсыам, айыам-тутуом», – диэн үрдүк санаалаах тарҕастылар.