Мин хос эһээм туһунан Ленинград суруналыыһа Иван Гончаров «Я, брат из пехоты» диэн кэрэхсэнэр кинигэтигэр үйэтиппит. Сатыы сэрии саллаата буолан, Сталинградскай, II Украинскай, I Белорусскай фроннарынан сэриилэспит. Сэбиэскэй Сойууһу, Румынияны, Польшаны босхолоспут. Биэс улахан өрүһү – Дон, Днестр, Одер, Висла, Шпрея – туораабыт. Сатыы Берлиҥҥэ тиийбит саха хорсун саллаата буолар. Түөрт төгүл бааһырбыт, өстөөх майорун билиэн ылбыт. 11 бойобуой наҕараадалаах, ол иһигэр 2 уордьаннаах.

Сэрии кэнниттэн эргиллэн кэлбитэ, биир да аймаҕа тыыннаах хаалбатах. Майаҕа үлэлээн баран, Кэбээйи райпотугар эппиэттээх үлэҕэ анаммыт. Манна кэргэннэммит. Онтон Аммаҕа көһөн тиийэн, 5 оҕоломмуттар. Улахан уола Тимирязев аатынан Академияны бүтэрбитэ, Тыа хаһаайыстыбатын миниистирин солбуйааччынан үлэлээбитэ, кыыһа Окорокова Ирина Дмитриевна -- СӨ Үөрэҕириитин туйгуна, Гурьева Анна Иннокентьевна – буҕаалтыр, Василий Иннокентьевич – УНО иниспиэктэрэ, Амма нэһилиэгин баһылыгынан өр сыл үлэлээбитэ, Николай Иннокентьевич – слесарь-моторист.   

 Иннокентий Васильевич барыта 50-ча наҕараадалаах, хайҕал бэлиэлээх буойун, салайааччы, аҕа, эһээ, хос эһээ буолар. Кинини кэбээйилэр “киэн туттар күтүөппүт” диэн ааттыыллар.

                                                 Дима Данилов,

II кылаас, Кэбээйи.