Сарсын, ол эбэтэр 2020 сыл балаҕан ыйын 3 күнүгэр, Аҕа дойду Улуу сэриитэ түмүктэммит күнэ. Бойобуой Албан Аат күнэ.

  Бу күн биһиги Ийэ дойдуларын дьоруойдуу көмүскээбит, 1945 с. Крымнааҕы (Ялтатааҕы) кэмпириэнсийэҕэ антигитлеровскай коалиция чилиэннэрэ Япония боппуруоһугар ылыммыт быһаарыныыларын чиэстээхтик толорбут биир дойдулаахтарбытын ахтан-санаан ылабыт, сырдык ааттарын кэриэстиибит.

 Милитаристскай Японияны утары сэриигэ Саха сириттэн тыһыынчаттан тахса киһи кыттыбыта. Үксүлэрэ Забайкальской фронт 94-с уонна 210-с стрелковай дивизиятын 39-с аармыйатыгар, итиэннэ 278-1 стрелковой дивизия 17-с аармыйатыгар сулууспалаабыттара. Сорохтор Уһук Илиннээҕи фронт 1-кы уонна 2-с чаастарыгар. Сэбиэскэй аармыйа Уһук Илиннээҕи хампаанньатын түмүгэр, Хотугулуу-Илин Кытай уонна Хотугу Кэриэйэ босхоломмуттара.  ССРС былдьата сылдьыбыт сирдэрин төттөрү ылбыта – Соҕуруу Сахалины уонна Курил арыыларын. Киһи аймах историятыгар саамай улахан, алдьархайдаах сэрии итинник түмүктэммитэ.

Хааннаах халабырдьыттартан дойдулары босхолообут аҕаларбытынан, эһэлэрбитинэн, хос эһэлэрбитинэн киэн туттабыт. Кинилэр ийэ дойдуларын көмүскээбиттэрэ, фашист чуматыттан Европаны өрүһүйбүттэрэ, Азия норуоттарын милитаристскай Японияттан быыһаабыттара. Бу Улуу Кыайыыбытын ким да сотуо, уларытыа, мэлдьэһиэ, былдьыа суохтаах.

         Аҕа дойду Улуу сэриитин бүппүт күнэ – норуоттар эйэлээхтик, иллээхтик өйдөһөн олорууларын туоһулуур бэлиэ күн.

         Саха Өрөспүүбүлүкэтин Ил Түмэн Судаарыстыбаннай Мунньах аатыттан сэрии уонна тыыл бэтэрээннэригэр, итиэннэ Саха сирин бары олохтоохторугар чэгиэн-чэбдик доруобуйаны, айымньылаах үлэни, Ийэ дойду чэчирии сайдыытын, үтүө санааны уонна эйэни баҕарабын!

 Ил Түмэн бэрэссэдээтэлэ  Петр Гоголев.