Балаҕан ыйын 3 күнүгэр, Иккис аан дойду сэриитэ түмүктэммит күнүгэр, Дьокуускай бүтүн Арассыыйатааҕы “Эйэ уота. Кыайыы иһин охсуһуу” (Свет мира. Борьба за победу) аахсыйаҕа кыттыһыа. Бу түүн куорат телебашнята ССРС “Японияны Кыайыы иһин” мэтээлин лиэнтэлэрин өҥнөрүнэн – кыһылынан, саһархайынан, маҥанынан – умайан сандаарыа.

Арассыыйа атын куораттара эмиэ түүҥҥү уоттарынан киэркэйиэхтэрэ. Бу аахсыйанан дойду ССРС Кыһыл аармыйата Квантунскай аармыйаны кыайбытын бэлиэтиир.

Аахсыйаны тэрийээччилэр Дьокуускай олохтоохторун уонна ыалдьыттарын телебашня фонугар хаартыскаҕа түһэн баран, #безвойны уонна #светмира диэн хештегтаах социальнай ситимнэргэ таһааралларыгар ыҥыраллар. Санатан эттэххэ, #ДВПобеда#УрокиВтороймировой диэн хештегтаах хаартыскалар год2020.рф диэн саайтка автоматически киирэн, Улук Илиҥҥи Кыайыы хаартыскатын паззларын өлүүскэлэрэ буолан иһэллэр.

СӨ “РТПЦ” иһитиннэрэринэн, телебашня уоттара киэһэ 21 чаастан түүн 23 чааска диэри холбонуохтара (Дьокуускай бириэмэтинэн).