Ол курдук, быйыл тохсунньу 13 күнүттэн муус устар 30 күнүгэр дылы уопсайа 16 мөлүйүөн 187 266 солкуобай 80 харчы киирбит. Онтон 2 466 344 солкуобай суума Кыайыы 75 cылыгар уонна Аҕа дойду Улуу сэриитин туһунан кинигэ бэчээттээһинигэр ыытыллыбыт.
Маннык акция Улуу Кыайыы үбүлүөйдээх сылын көрсө тэриллэр. Кыайыы пуондатын тэрийии ыыра кэҥээн иһэрэ, кыттыһар дьон, тэрилтэ ахсаана элбээн иһэрэ үөрдэр.
Санатар буоллахха, 2015 сыллаахха Аҕа дойду сэриитэ ааспыта 70 сылыгар Саха Өрөспүүбүлүкэтэ сыл устата 12 мөлүйүөн сууманы хомуйбута.
«Бу маннык пуонда тэриллэр сүрүн сыала — Улуу Кыайыыны көрсөр тэрээһиннэргэ көмө буолар. Бастатан туран, сэрии кыттыылаахтарын ахтыыларын, кинигэлэрин бэчээттээһиҥҥэ, үйэтитиигэ туһуланар. Маны сэргэ киирбит харчы документальнай уонна уус-уран киинэлэри устууга ыытыллар», — диэн Саха Өрөспүүбүлүкэтин бэтэрээннэрин Сэбиэтин бэрэссэдээтэлэ Вильям Иванов этэр.
Маны таһынан, киирбит харчы Кыайыы пааркатын, Сэбиэскэй Сойуус дьоруойа Владимир Лонгинов аатынан сквери тутууга, уулуссалары, Кыайыы болуоссатын тупсарыыга, өрөмүөннүүргэ, үбүлүөйдээх сыл мэтээллэрин оҥорууга, “Кыайыы тыыннаах куоластара” (“Живые голоса Победы”) киинэни устууга уо.д.а. тэрээһин үлэтигэр туттуллуоҕа.
«Итиэннэ Арассыыйа буойун куораттарыгар уонна да атын сэрии ыар тыына хаарыйбыт сирдэригэр экспедиция тэринэн, сылын ахсын ыччаттар сэрии толоонугар охтубут биир дойдулаахтарын, аймахтарын уҥуоҕун көрдүү аттаналлар. Маннык көрдүүр этэрээттэргэ бу киирбит үп төһүү буолуоҕа”, — диэн Вильям Иванов этэр.
Саха Өрөспүүбүлүкэти Ил Дархана Айсен Николаев бэйэтинэн бу үтүө санаа акциятыгар кыттыһарга ыҥыран туран, 100 тыһыынча харчыны пуондаҕа укпута. «Күндү Сахам сирин олохтоохторо! 2020 сыл — биһиги дойдубутугар, өйбүтүгэр-санаабытыгар олус суолталаах даата. Аҕа дойду Улуу сэриитигэр Кыайыыбыт 75 сыла! Алдьархайдаах сэрии чэр баас хаалларбатах, чугас киһини сүтэрии ыар тыына ааҥнаабатах, биир дойдулаахтарын хорсун быһыыларынан киэн туттубатах ыал диэн суох. Мин эһэм Андрей Титович Титаров сэриилэспитэ, Сталинград аннынан кыргыһыыга, Донской фронт 65 аармыйатын 252 стрелковай дивизиятын 932 полкатын пулеметчига», — диэн суруйар бэйэтин ыҥырыытыгар Айсен Николаев.
Саха Өрөспүүбүлүкэтин Ил Түмэнин бэрэссэдээтэлэ Петр Гоголев Саха Өрөспүүбүлүкэтин бэтэрээннэрин сэбиэтин бэрэссэдээтэлэ Вильям Иванову кытта көрсүһүүтүгэр: “Кыайыы-75» пуонда эстафетата тэтимин эбэн иһэрин көҕүлүөх тустаахпыт. Хас биирдии киһи бу үтүө акцияҕа кыттыһарын ааһан, дьону көҕүлүүр, түмэ тардар кыахтаах”, — диэн туран кэллиэгэлэрин, дьокутааттары, үтүө санаа эстафетатыгар хото кыттарга ыҥырбыта.
Билиҥҥи туругунан өрөспүүбүлүкэ араас тэрилтэлэриттэн, биирдиилээн да дьонтон харчы киирэ турар. «Бу акция өр кэмнээх. Киирбит харчы тутатына бу сыл устата туттуллуохтаах диэн буолбатах. Уһун кэмнээх бырайыактарга эмиэ ууруллар. Кэлэр үбүлүөйдээх сылга, о.э. 2025 сылга дылы ыытыллар тэрээһиннэргэ эмиэ ананар», — диэн Саха Өрөспүүбүлүкэтин бэтэрээннэрин сэбиэтин бэрэссэдээтэлэ Вильям Иванов тоһоҕолоон этэр.
Ити курдук, сэрии толоонугар охтубут, сураҕа суох сүппүт буойуттар ааттарын үйэтитиигэ, бэтэрээннэри өйүүргэ, Улуу Кыайыы өрөгөйүн көрсөргө туһуламмыт араас хабааннаах тэрээһин үлэтигэр пуонда көмө буолара саарбахтаммат.
Бэйэ баҕатынан маннык акцияҕа кыттыы хайҕаллаах. Үрүҥ күн анныгар үлэлии-хамсыы сылдьарбыт – улуу дьол. Ол туһугар үрүҥ тыыннарын толук уурбут хорсун буойуттарбыт, эһэлэрбит, эбэлэрбит кыа хааннарынан, хара көлөһүннэринэн тоҕон ситиспит Улуу Кыайыыларыгар сүгүрүйүү, дириҥ ытыктабыл бэлиэтэ буолар.
“Кыайыы-75” пуондаҕа ким баҕалаах бэйэтин сэмэй кылаатын киллэриэн сөп:
ИНН 1435030002 КПП 143501001
Банк: ЯКУТСКОЕ ОТДЕЛЕНИЕ
номер 8603 ПАО СБЕРБАНК г. Якутск
Расч. счет: 40703810876000000546
Корр. счет: 30101810400000000609
БИК: 049805609
Назначение платежа: КБК: 14800000000000000180 п.1-Безвозмездное перечисление для проведения мероприятий, посвященных 75-летию Победы в Великой Отечественной войне.
Ирина Ханды
-
0
-
0
-
0
-
0
-
0
-
0
