Кыайыы күнүн көрсө «Бичик» издательствота СӨ  Инновацияҕа, сыыппаранан сайдыыга уонна инфокоммуникационнай технологияларга министиэристибэтин  быһаччы кыттыытынан  «Саха сирин дьонун өлбөт-сүппэт хорсун быһыыта» диэн кинигэ-альбому бэчээттээн таһаарда.  «Ураты кинигэни Судаарыстыбаннай архыып, «Бичик» издательствотын кэлэктииптэрэ оҥорон таһаардылар.   Коронавирус дьаҥын кэмигэр 5000 ахсаанынан бэчээттэммитэ махталлаах дьыала. Архыыптан ылыллыбыт  ураты дааннайдар уонна хаартыскалар бааллар.  Кинигэ «Бичик» издательствотын бары маҕаһыыннарыгар атыыланыаҕа. Бэрт сотору Арассыыйатааҕы Литрес платформатыгар сыыппаранан  кинигэтэ тахсыаҕа. Оччоҕуна ураты кинигэни Арассыыйа араас муннуктарыгар олорор биир дойдулаахтарбыт көрөр, ааҕар кыахтаныахтара», - диэн инновацияҕа, сыыппаранан сайдыыга уонна инфокоммуникационнай технологияларга миниистирэ Анатолий Семенов иһитиннэрдэ.

«Бичик» издательствотын кэлэктиибэ анал бырайыагы олоххо киллэрэргэ улахан үлэни ыыппыта көстөр. Элбэх матырыйаалы хомуйуу эрэ буолбакка, хас биирдии матырыйаалы ырытан-сыныйан оҥоруу, туруоруу элбэх үлэттэн- сырыттан тахсар. Кинигэҕэ Улуу сэрии, тыыл бэтэрээннэрин,  сэрии тулаайахтарын, көһөрүллүүгэ түбэспиттэр ахтыылара киллэриллибиттэр.  Онтон альбомугар сэдэх хаартысканан матырыйааллар уонна докумуоннар тиһиллибиттэр. Кинигэ-альбом Саха сирин дьоно төрөөбүт дойдуларын хайдах көмүскээбиттэрин чуолкайдык, итэҕэтиилээхтик кэпсиир. Кинигэни оҥорооччулар Арассыыйаны идеология өттүнэн  атаакалааччылары утары архыып дьиҥнээх матырыйаалларынан  уонна Аҕа дойду Улуу сэриитин  эттэринэн-хааннарынан билбит-көрбүт дьон этиилэринэн, санааларынан  итэҕэтиилээхтик  ытаһа оҥорбуттар.  «Ураты кинигэ бэчээттэннэ. Өрөспүүбүлүкэ үгүс көлүөнэтэ долгуйа көрүөҕэ, ааҕыаҕа. Ол курдук, Улуу сэрии  алдьархайын эттэринэн-хааннарынан билбит бэтэрээннэр эрэ буолбакка, хас биирдии дьиэ кэргэн бэйэлэрин историяларын бу баардыы ааҕыахтара, көрүөхтэрэ. Кинигэни оҥорууга бэчээттээччилэр эмиэ улахан үлэни көрүстүлэр. Судаарыстыбаннай сакааһы үрдүк хаачыстыбалаахтык толордулар», - диэн «Сахамедиа» РИИХ АУо генеральнай дириэктэрэ Алексей Чертков эттэ.  

​Хаартыска: Денис Попов