Салиман-Владимиров 1903 с. ыам ыйын 27 күнүгэр Одесса куоракка төрөөбүт, Санкт-Петербургдааҕы, Москватааҕы консерваторияларга үөрэммит дэгиттэр улахан музыкант-пианист, аккомпаниатор, композитор. Кини сэрии кэмигэр 1944 с. Саха сирин культуратын, ырыатын-тойугун кытта билсибит. М.Н.Жирков саамай тахсыылаахтык үлэлии сылдьар кэмэ. Марк Жирков ити кэмҥэ Москваҕа «Саха ырыаларын репертуара» диэн боппуруоска үлэлэһэ сылдьыбыта. Онон Салиман-Владимировтыын алтыспыт, саха ырыаларын билиһиннэрбит буолуохтаах, Маршка ханнык ырыа мелодията киириэхтээҕин да ырытыспыта буолуо дии. Хомойуох иһин, кинилэр алтыһыыларын туһунан киэҥник ханна да суруллубутун түбэһэн ааҕа иликпин. Онон Салиман-Владимиров кылгас кэм иһигэр үлэлээн, сырдыкка, кэрэҕэ тардыһыылаах, иэйиилээх саха музыкатын сүһэн ылан, хомуйа тутан бүтүн союзка, аан дойдуга иһиллэр өрөгөй музыкатын айан кыра-хара саха норуотун ааттаттаҕа эриэккэһин!!! Кэлин «Ыччат ырыата», «О Якутии пою» ырыанньыктары, «Священный Ильмень» 4 чаастаах симфонияны, «Цвети, Якутия родная» ырыалар хомуурунньуктарын бэчээттэтэн, саха музыкальнай культурата сайдарыгар дьоһун кылаатын киллэрбит киһи буолар.
Дьэ, бу маршпыт кэлин сылларга Кыһыл болуоссакка буолар парадка, мин кэтээн көрүүбүнэн, тыаһаабат буолбутуттан хомойон, «Саха правительствота, культура министерствота, Москваҕа туруорсуҥ» диэн хаста да хаһыакка суруйан, республика радиотынан, телевидениенэн, мунньахтарга этэн көрбүтүм да, хамсааһын баара биллибэт. Кэлин парадтарга «Через две зимы» эҥин курдук аныгы ырыалар музыкалара тыаһыыллара иһиллэр. Билиҥҥи ыччат маннык марш баарын да билбэт буоллулар. Онон саха музыкатын маннык сүдү ситиһиитин умуннарбат, сүтэрбэт, кэнчээри ыччаппытыгар айар үлэҕэ ыҥырар сулус буолан, сахатын норуотунан киэн туттар патриотическай өйүн-санаатын күүһүрдэр туһугар бу боппуруоһу уталыппакка туруорсан историческай кырдьыгы чөлүгэр түһэрэр үлэни правительство, Ил Дархан, Ил Түмэн үлэлэһэллэрин күүтэбин. Оччоҕо эрэ «Сомоҕолоһуу», «Патриотизм» сыллара дии-дии биллэрэр тылларбыт дьиҥнээхтик олоххо киирэн суолталаныа этилэр.
РФ, САССР культураларын үтүөлээх үлэһитэ,
РФ журналистарын Союһун чилиэнэ В.Парников
- 0
- 0
- 0
- 0
- 0
- 0