Дьиэ кэргэн аҕа баһылыга Гаврил Сергеев амарах аҕата Гаврил Афанасьевич Аҕа дойду Улуу сэриитэ саҕаланаатын кытта, аармыйаҕа ыҥырыллан барбыта уонна 1945 сыллаахха дойдутугар эргиллэн кэлбитэ. Кини 1995 сыллаахха күн сириттэн күрэммитэ. Гаврил Афанасьевич 49 сыл устата хомуньуус партия кэккэтигэр чилиэнинэн сылдьыбыта, олоххо актыыбынай позициялааҕа.

Сергеевтар дьиэ кэргэттэрэ үбүлүөйдээх Улуу Кыайыы бырааһынньыгар аҕаларыгар кэриэстэбил уонна өйдөбүнньүк оҥорон, чугас киһилэрин үөлээннээхтэригэр соһуччу бэлэх оҥорор гына, эрдэттэн былааннаммыттара.

Бу ыал сыл ахсын сүүрбэ сүөһүнү кыстаталлар уонна үөр сылгылаахтар. Сыл ахсын 10-11 ынахтара төрүүр. Онон, этэргэ дылы, кинилэргэ үрүҥ илгэ үрүйэлии устар. Ол бородууксуйаларынан иитээччи идэлээх дьиэ кэргэн ийэтэ Мария Николаевна астаан-үөллээн, ытык кырдьаҕастарга анаан быырпах, суорат, бутугас, дырыһааҥкы уонна көбүөрдээх лэппиэскэ бэлэмнээбитэ. Аҕаларын сэриигэ сылдьыбыт хаартыскатын араамалаабыттара.

Ыал аҕа баһылыга Гаврил Гаврильевич сиэннэрин батыһыннара сылдьан, сэрии бэтэрээнигэр Василий Ананьевичка уонна биэс тыыл бэтэрээнигэр олохтоох бородууксуйаттан нобуору уонна аҕатын хаартыскатын бэлэхтээтэ. Инньэ гынан бэтэрээн сыдьааннара, тыыннаах ситимнэрэ ытык кырдьаҕастары үөртүлэр да, долгуттулар да, үгүс истиҥ махтал тылларын иһиттилэр. Гаврил Сергеев тустаах үтүө дьыала амарах санааланыыны таһынан, оҕону, ыччаты иитэр суолтата улаханын бэлиэтиир.