Улахан убайдара 27 саастаах Петр Михайлович, ыараханнык бааһыран, Саратовскай уобалас Балашов куоратыгар 1942 сыл алтынньы 9 күнүгэр госпитальга сырдык тыына быстыбыта уонна куорат кылабыыһатыгар көмүллүбүтэ.

Учуутал идэлээх иккис уол Семен Михайлович баара эрэ сыл аҥаара сэриилэспитэ. Өстөөх хаанымсах буулдьата 26 саастаах уолчааны 1943 сыл сэрии толоонугар тыынын быспыта. 780-с стрелковай полк рядовой саллаата Сталинградскай уобалас Вертячай дэриэбинэтигэр көмүс уҥуоҕа хаалбыта.

Үһүс бырааттара Иннокентий Михайлович 22 сааһыгар сэриигэ ыҥырыллыбыта. Сэрии ытылҕана олоҕун суолун атыннык эрийбитэ. Кини сураҕа суох сүппүтүн туһунан сурах эмиэ кэлэ сылдьыбыта. Кэлин көстүбүт докумуоннар кэпсииллэринэн, отделение хамандыыра, ефрейтор Иннокентий Попов сэрии хонуутугар 1945 сыл муус устар 16 күнүгэр геройдуу охтубут. Кэлин Латвия Лиепайскай оройуонун Приекульскай  кылабыыһатыгар көмүллүбүт.

Кыра уол Николай Иннокентийтан биир эрэ сыл кыра этэ. 243-с стрелковай полк рядовойа. 1942 сыл алтынньы 2 күнүгэр кыргыһыыга ыараханнык бааһырбыт. Кинини Горькай куорат госпиталыгар сытыарбыттар, онтон өрүттүбэккэ, нөҥүө сыл тохсунньу 25 күнүгэр сырдык тыына быстыбыт.

          Ини-бии Поповтар ааттара умнуллубат. Бииргэ төрөөбүт балтылара Елена Михайловна сэрии кэнниттэн Неустроев Семен Лукичтыын ыал буолан хас да оҕоломмуттара. Ини-биилэр күтүөттэрин балта Говорова Акулина Лукинична Балыктаахха олорбута. Кини тыыннааҕар көҕүлээн, үбүлээн, Үрэх Төрдүгэр бырааттыы Поповтарга пааматынньык аспыта. Саас аайы оскуола оҕолоро походунан бараллар, көрөллөр-харайаллар. Бэдьимэҕэ туруоруллубут өйдөбүнньүк дуоскаҕа ини-биилэр ааттара көмүс буукубанан суруллан турар.