Бырабыытылыстыба баһылыга бэлиэтээбитинэн, кыра углеродтаах (низкоуглеродная) энэргиэтикэҕэ сыыйа көһүү аан дойду экэниэмикэтин тутуһар хайысхата буолар.
Мишустин миниистирдээр дойдуну 2030 сылга диэри бу уларыйыыларга сөп түбэһиннэрэн көһөрүү былаанын бэлэмнии сылдьалларын туһунан иһитиннэрдэ. Бу дьыл ахсынньы 15 күнүгэр диэри былаан силигин ситэрэн, бигэргэтэр санаалаахтар. Маныаха үлэни сүрүннүүр анал рабочай бөлөхтөр тэриллиэхтээхтэр эбит.
«Бу хайысхаҕа тэрээһиннэри вице-премьердэр салайыахтара, онтон уопсай үлэ хаамыытын Бырабыыталыстыба бэрэссэдээтэлин бастакы солбуйааччы Андрей Белоусов сүрүннүөҕэ», – диэн премьер чопчулаата.
«Бу килиимэт уларыйыытын кытары охсуһуу буолбатах. Туох ханнык иннинэ, аан дойду инники күөҥҥэ сылдьар экэниэмикэтин саҥа технологическай таһымҥа таһаарыы диэн буолар. Маныаха сиртэн хостонор уматыгы туттуубут сыыйа аччыыр суолга киириэхтээх», – диэн бастакы вице-премьер быһааран биэрдэ.
Мунньах түмүгэр Белоусов: «Бу уларыйыылар аны биэс-уон сылынан аан дойду экэниэмикэтин тосту уларытар кыахтаахтар», – диэтэ.
РИА «Новости» матырыйаалынан.
-
0
-
0
-
0
-
0
-
0
-
0
