Издательский дом Редакция Подписка
Погода в Якутске: . -24 oC
КУРС ЦБ: $ 71,53 | 82,83

Сахалартан греко-римскэй (классическай) тустууга бастакынан ССРС спордун маастара буолбут, нуучча дуобатыгар маастарга хандьыдаат, "Урожай" ДСО Бочуоттаах чилиэнэ, "Көҥүл тустуу сайдыытыгар киллэрбит кылаатын иһин" бэлиэ хаһаайына, Амма улууһун, итиэннэ Амма-Наахара уонна Болугур нэһилиэктэрин Бочуоттаах гражданина, спорт, үлэ бэтэрээнэ Дмитрий Гаврильевич Максимов бу дьыл атырдьах ыйын 28 күнүгэр ыарахан ыарыыттан олохтон туораата.

Сахалартан греко-римскэй (классическай) тустууга бастакынан ССРС спордун маастара буолбут, нуучча дуобатыгар маастарга хандьыдаат, "Урожай" ДСО Бочуоттаах чилиэнэ, "Көҥүл тустуу сайдыытыгар киллэрбит кылаатын иһин" бэлиэ хаһаайына, Амма улууһун, итиэннэ Амма-Наахара уонна Болугур нэһилиэктэрин Бочуоттаах гражданина, спорт, үлэ бэтэрээнэ Дмитрий Гаврильевич Максимов бу дьыл атырдьах ыйын 28 күнүгэр ыарахан ыарыыттан олохтон туораата.

0c86cce9 a94a 47ed a5dc 51f2be1b9563

Дмитрий Гаврильевич кыыс Амма кытылыгар турар Амма-Наахара сэлиэнньэтигэр 1937 с. кулун тутар 3 күнүгэр төрөөбүтэ. Аас-туор олох охсуута, сэрии идэмирдээх иэдээнэ кыракый Диманы тулаайах хаалар дьылҕалаабыта. Бастаан утаа аймахтарынан олорон, кэлин интэринээккэ иитиллэн, олох киэҥ аартыгар үктэммитэ. Эт-хаан өттүнэн сайдыылаах уолу таба көрөн, тириэньэрдэр Н.С.Васильев уонна П.В.Нохсоров волейболга утумнаахтык дьарыктаабыттара, спорка тапталы сахпыттара. Спортсмен эр бэрдэ физическэй култуура Омскайдааҕы судаарыстыбаннай инстутугар үөрэнэ киирбитэ. 1956-1963 сылларга устудьуоннуур кэмигэр спорт араас көрүҥэр бэйэтин холонон көрбүтэ. Ол курдук, тириэньэр Н.Кукушкиҥҥа эрчиллэн, уобулас хоккейга сүүмэрдэммит хамаандатыгар оонньообута. Боксанан, волейболунан эмиэ дьарыктаммыта. Бу үс көрүҥҥэ иккис спортивнай разряды толорбута.

Иккис куурустан Ю.Я.Сапожников салайар классическай тустуу секциятыгар сылдьан саҕалаабыта. Сыл аҥаарын иһигэр иккис разряды толоро охсубута – онно тустуук буолуохтааҕын бүтэһиктээхтик быһаарыммыта. Кини ССРС үтүөлээх тириэньэрэ В.В.Громыкоҕа эрчиллибитэ.

1958-1961 гг. Сэбиэскэй Аармыйа кэккэтигэр ыҥырыллан сулууспалаабыта. 1958 с. Тихоокеанскай флот классическай тустуутун күрэҕэр үрүҥ көмүс призер буолбута. 1959-1960 сс Тихоокеанскай флот, Приморскай кыраай чөмпүйүөнүн үрдүк аатын сүкпүтэ.

1961 с. бастакы тириэньэрэ Ю.Я.Сапожников аатынан Бүтүн Сойуустааҕы турнирга боруонса мэтээли ылбыта.

1963 с. Москваҕа «Буревестник» ДСО Киин сэбиэтин күрэхтэһиитигэр  57 кг ыйааһыннаахтарга иккистээбитэ. Саха сиригэр 1961, 1963 сылларга өрөспүүбүлүкэ муҥутуур кыайыылааҕа.

4176f75a c3a9 4648 a3dc 9ea8089be32f

Үрдүкү физкультурнай үөрэхтээх учуутал Д.Г. Максимов үлэлээбит кыһаларын аайы (Бүлүү педучилищетыгар, Уус Алдаҥҥа, Мэҥэ Ханаласка, Булуҥҥа, Аммаҕа) спортивнай базаны тэрийиигэ, эдэр көлүөнэни спорка сыһыарарга үгүс сыратын биэрбитэ, өрөспүүбүлүкэҕэ бастакынан зачетнай систиэмэни киллэрбитэ. Кини үөрэппит оҕолоро спорт маастардара, маастарга хандьыдааттар: Амматтан Е. Ефремов, В.Никитин, В.Ефремов, Н.Барабанов, Е.Федоров, Уус Алдантан Даниловтар, Черкашиннар, Черноградскайдар, волейболист Роман Филиппов.   

Дмитрий Гаврильевич Амма улууһугар “Урожай” ДСО бэрэссэдээтэлинэн уһуннук үлэлээбитэ. Кини дуобакка маастарга хандьыдаат нуорматын толорбута. Ону таһынан ааттаах үчүгэй суруналыыс уонна хомоҕой тыллаах хоһоонньут бэрдэ. Ахтыыларын, ыстатыйаларын, хоһооннорун түмэн, 2018 сыллаахха “Маастар буола үүммүппэр махталым – Кыыс Аммаҕа” диэн кинигэни бэчээттээн таһаарбыта.

Ил Түмэн дьокутаата Татьяна Дмитриевна Егороваҕа тапталлаах аҕата Дмитрий Максимов өлбүтүнэн дириҥ кутурҕаммытын "Ил Түмэн" издательскай дьиэ аатыттан тиэрдэбит.    

Саха Өрөспүүбүлүкэтин ХХ үйэ бастыҥ спортсменынан ааттаммыт Дмитрий Максимов сырдык аата өрүү ааттана туруоҕа.

b8e0d613 8a16 4821 817d a736304fc829

 

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
ПОДЕЛИТЬСЯ СТАТЬЕЙ