Ону сэргэ Саха сирин уонна Ньурба улууһун салалталара мэҥэ кинигэ уонна киинэ таһааралларын былаанныыллар. Маны таһынан, Норуоттар икк ардыларынааҕы буоксаҕа турнир ыытыллара былааннанар.

Ыспыраапка

Артур Иннокентьевич 1954 сыллаахха олунньу 15 күнүгэр Ньурба Антоновкатыгар төрөөбүтэ. Үрдүк категориялаах тириэньэр, Саха сиригэр уонна Арассыыйаҕа буокса успуорда сайдарыгар улахан кылааттаах. Спортсмен быһыытынан үрдүк ситиһиилэрдээх: өрөспүүбүлүкэтээҕи, Арассыыйатааҕы, Бүтүн сойуустааҕы чөмпүйэнээттэр кыайыылаахтара буолар. 2001 сыллаахха «Арассыыйа үтүөлээх тириэньэрэ» Бочуоттаах ааты ылбыта, 2019 с. Арассыыйа физическэй култууратын Үтүөлээх үлэһитэ буолбута. 2003 с. кинини Уһук Илиҥҥи федеральнай уокурук Бастыҥ тириэньэринэн билиммиттэрэ.

Биир сыл анараа өттүгэр, алтынньы 14 күнүгэр, буоксаҕа Арассыыйа үтүөлээх тириэньэрэ Артур Пахомов олохтон туораабыта. Кини чиэһигэр, «Демография» национальнай бырайыак чэрчитинэн, Антоновка сэлиэнньэтигэр спортивнай комплекс иннигэр пааматынньык арыллыбыта. Билигин спортивнай эбийиэк Артур Пахомов аатын сүгэр.

«Артур Иннокентьевич өҥөлөрүн туһунанхос эбии этинэр наадата суох, ону барытын бэркэ диэн бары билэҕит. Кини уопуттаах тириэньэр быһыытынан Олимпийскай оонньууларга үс спортсмены бэлэмнээбитэ. Ньурба улууһун дьаһалтатын аатыттан пааматынньык ааптарыгар махтал тылларын тиэрдэбин. Биһиги Наталья Васильевналыын (Артур Пахомова кэргэнэ)  пааматынньык оҥорон таһаарыы бырасыаһын үлэ саҕаланыаҕыттан кэтээн көрбүппүт, сорох түгэннэргэ, көннөрүү киллэрэри ситиспиппит. Көрдөһүүбүт барыта туолбута, пааматынньык олус үчүгэй, түмүгэр дьоһуннаах буолла», — диэн буоксаҕа Олимпийскай оонньуулар боруонса призера, өрөспүүбүлүкэ Баһылыгын сүбэһитэ Георгий Балакшин иһитиннэрдэ.

Кини этэринэн, сотору кэминэн Артур Пахомов туһунан ахтыы кинигэ тахсыаҕа, киинэ уһуллар уонна Саха сиригэр норуоттар икк ардыларынааҕы буоксаҕа турнир ыытарга сүрүн сорук турар. Сиэр-туом кыттыылаахтара бэлиэтииллэринэн, Артур Пахомов өрөспүүбүлүкэ аҕыйах ахсааннаах нэһилиэгиттэн буоксаҕа карьератын саҕалаан аан дойду таһымыгар тиийэ үрдүк ситиһиилэммитэ.