Ити курдук, Виктор Рассадин Европа чөмпүйүөнэ Курбан Ширяевы кытта киирсиигэ  кыайыылааҕынан тахсан (7:6), салгыы утарсааччыта Казахстан бэрэстэбиитэлэ Сырбаз Талгат буолла. Манна Орто Халыма олохтооҕо улахан ыарахаттары көрсүбэккэ, 12:1 ахсаанынан, эрэллээх кыайыыны чэпчэкитик ситистэ. Күрэхтэһии сүрдээх тыҥааһыннаахтык барда. Ол кэннэ тустууга Виктор Рассадин — Усман Шахгиреевы (Красноярскай) 6:1 ахсаанынан кыайда! 

Ол курдук, Виктор Рассадин финалга таҕыста, манна утарсааччыта Кабардино-Балкария Өрөспүүбүлүкэтин аан дойдутааҕы кылаастаах спорт маастара Анзор Закуев буолуоҕа. 

70 кг диэри ыйааһыҥҥа финалы тохсунньу 28 күнүгэр биһиги бириэмэбитинэн киэһэ 20:15 ч. "Спорт без границ" ютуб ханаалга көрүөххэ сөп. Виктор Рассадин күрэстэһээччитин кытта көмүс мэтээл иһин киирсэр. 

Атын спорстменнар - Петр Копылов, Уйгулаан Иванов, Петр Константинов, Семен Владимиров - тэҥник киирсэн хоттордулар.

Икки төгүллээх олимпийскай чөмпүйүөн Иван Ярыгин сырдык кэриэһигэр 33-с төгүлүн көҥүл тустууга норуоттар икки ардыларынааҕы турнир Красноярскайга ыытыллар.

Тустууну көтүтүмэҥ.Казахстаантан Сырбаз Талгаты, Красноярскайтан Усман Шахгиреевы уонна хамаанда саамай уопуттаах тустууга, Арассыыйа чөмпүйэнээтин хас да төгүллээх призера, устудьуоннарга аан дойду чөмпүйүөнэ, аан дойду Кубогын кыайыылааҕа, норуоттар икки ардыларынаҕы кылаастаах спорт маастара Виктор Рассадин киирсиилэрин көрүҥ.

Виктор Рассадиҥҥа ситиһиини эрэ баҕарабыт!

Финалга киирсиэхтэрэ:

57 кг Рамиз Гамзатов (Дагестан) – Ахмед Идрисов (Дагестан).

61 кг Федор Балтуев (Иркутскай) – Абасгаджи Магомедов (Дагестан).

70 кг Виктор Рассадин (Саха сирэ) – Анзор Закуев (КБР).