Аартык сэлиэнньэтин дьоно көхтөөхтүк кытыннылар, иһитиннэрии кэнниттэн ыйытыылары биэрдилэр. Ол курдук, нэһилиэнньэ иһэр ууларын хаачыстыбата электрическай уоттарын кыамтата мөлтөҕүн, тустаах специалистар суохтарынан хаарбах, саахалланар туруктаах дьиэлэр бырагыраамаҕа сатаан киирбэттэрин туһунан кэпсээтилэр. Маны таһынан учаастактааҕы полиция суоҕун уонна улуус киинин кытары суолунан айан таксита үлэлээбэтин ыйдылар. Төрүт нэһилиэгэр 47 киһи кэлэн отчуоту иһиттэ. Кинилэр кыһалҕалара эмиэ сытыы. Нэһилиэккэ быраастара суоҕун, учаастактааҕы балыыһа сабылларын туһунан боппуруос турарын этиннилэр. Олохтоох хочуолунай эргэрэн үгүстүк саахал буоларын, “Колыма” федеральнай суолугар тахсар суол саас аайы алдьанарын, ходуһа сирин докумуоннуурга көмөлөһөр тыа хаһаайыстыбатын специалиһа суоҕун туһунан кэпсээтилэр. Бу икки нэһилиэккэ сырыы түмүгүнэн нэһилиэнньэттэн киирбит ыйытыылар уонна этиилэр боротокуолга киирдилэр.
- 0
- 0
- 0
- 0
- 0
- 0