Маны таһынан, дэлэгээссийэ састаабыгар СӨ баайга-дуолга уонна сир сыһыаннаһыыларыгар миниистирин бастакы солбуйааччы Владимир Степанов, тыа хаһаайыстыбатын миниистирин солбуйааччы Николай Афанасьев, “Саха ынаҕа” тэрилтэ салайааччыта Александр Артемьев, тыа хаһаайыстыбатын министиэристибэтин үлэһиттэрэ киирдилэр.
Ньурба улууһун дьаһалтатыгар “Степан Васильев аатынан сылгы собуотун” баҕа өттүнэн сабыллыытыгар туһуламмыт сүбэ мунньах буолан ааста. Бу собуот оннугар “Саха ынаҕа” тэрилтэ анал салаата аһыллыахтаах. Онно мэгэдьэк сылгытын боруодатын салгыы сайыннарыахтаахтар. Мунньах кэмигэр тэрээһин уонна үбүлээһин боппуруостарыгар тохтоотулар.
Акана нэһилиэгэр Чкалов учаастагар 100 сүөһү турар саҥа хотоно үлэҕэ киириитин сиэрэ-туома буолан ааста. Манна, санатан эттэххэ, алтынньыга Амма улууһун Болугуруттан, Нам улууһун Таастааҕыттан уонна Горнай улууһун Маҕараһыттан 50 саха боруода сүөһүнү аҕалбыттара. Саҥа хотон олус кылгас кэм иһигэр тутуллан үлэҕэ киирдэ.
Урут Чкалов учаастагар 280 киһи олороро. Билигин баара-суоҕа 9 ыал олорор. Онон саҥа тэрилтэ Ньурба улууһун биир ыраах бөһүөлэгэ хаттаан сөргүйэригэр олук ууруо диэн олохтоохтор эрэнэллэрин биллэрдилэр. Билигин нэһилиэк дьаһалтатын уонна олохтоохторун иннигэр саха боруода сүөһүнү элбэтэр дьоһун сорук турда.
- 0
- 0
- 0
- 0
- 0
- 0