Бу улуус саамай кытыы нэһилиэнньэлээх пуунугар ааспыт үйэ 70-с сылларыгар тутуллубут икки 4 квартиралаах дьиэ саахалланар туруктаахтарынан билиниллэн, туһааннаах бырагыраама саҥа түһүмэҕэр киирбиттэрэ. Оттон саҥа дьиэлэри номнуо ыам ыйыгар бүтэрэн туттарар былааннаахтар.
Бу буор суоллаах, киһи тиийэригэр ыарахаттардаах нэһилиэнньэлээх пуун гражданнары саахалланар туруктаах дьиэлэртэн көһөрүү бырагырааматыгар ситиһиилээхтик кыттыыта улууска аан бастаан бэлиэтэннэ. Хахыйах сэлиэнньэтэ улуус кииниттэн 76 км. Дьыл уларыйар кэмигэр сэлиэнньэ атын нэһилиэктэри кытта сибээһэ суоҕун кэриэтэ.
Нэһилиэк баһылыга Мария Кронникова үлэлэрин-хамнастарын, үүтү туттарыы хаамыытын туһунан кэпсээтэ итиэннэ сэлиэнньэни тупсаҕай оҥорууга былааннарын үллэһиннэ. Ол курдук, билигин 19 оҕо үөрэнэр оскуолатыгар хапытаалынай өрөмүөн ыытыллара уолдьаспыт. Ону сэргэ олохтоохтор спорт саалатын үлэҕэ киллэриини туруорсаллар.
Кини гражданнары саахалланар туруктаах олорор дьиэлэртэн көһөрүү бырагырааматыгар кыттыылара сэлиэнньэ олоҕор саҥа тэтими эппитин эттэ. Бу Хахыйах сэлиэнньэтин олохтоохторугар дьиҥнээх бырааһынньыгынан буолар: 20 сыл кэнниттэн аан бастаан 4 квартиралаах икки дьиэ тутуута түмүктэнэн эрэр.
Айанын түмүгэр баһылык Андрей Ноговицын быһаарыллара уолдьаспыт боппуруостары хонтуруолга ылла.
Санаттахха, Саха сирин Ил Дарханын ыйааҕар сөп түбэһиннэрэн, Хахыйах сэлиэнньэтигэр култуура дьиэтин, атын дьону сэргэхситэр-сынньатар тэрилтэлэр үлэлэрэ тохтоон турар. Атын үлэ көҥүллэнэр, ол иһигэр оскуола аһыллыбыта.
«Чурапчы улууһа» МТ пресс-киинэ
- 0
- 0
- 0
- 0
- 0
- 0