Биир оннук киһинэн I Хаҥалас олохтооҕо Васильев Валерий Афанасьевиһы ааттыахха сөп.
Валерий Афанасьевич Үөһээ Дьааҥыттан төрүттээх. Орто Халыма улууһун Өлөөкө Күөлүгэр күндү күтүөт, олохсуйбута ыраатта. Тапталлаах кэргэн, амарах аҕа, эйэҕэс эһээ быһыытынан толору дьоллоох киһи. Кэмин саҕана араас үлэҕэ үлэлээн, тыа сирин хара үлэтин этинэн-хаанынан билбитэ. Ону дьон итэҕэлин ылан, нэһилиэк депутатынан талыллан үлэлээбитэ да туоһулуур. Билигин бочуоттаах сынньалаҥҥа олорор. “Олорор” диэн ити сурукка эрэ этиллэр. Валерий, дьэ, төрүт олорбот киһи. Кини нэһилиэккэ туох эмэ суолталааҕы, туһалааҕы оҥорор күүстээх баҕа санаалаах. Ол курдук, Арчы дьиэтин тутуутун, бөһүөлэктэн учаастактарга айанныырга баар уулаах сирдэри туоруурга техникаҕа аналлаах муосталары, сатыы дьон сылдьарыгар аналлаах күргэни ааттаталыахха сөп.
Оттон бу сайын Валерий нэһилиэк кыһыннары-сайыннары аһаан-сиэн олорор Омук Күөлүгэр барар суолга сиэни туоруур муостаны собус-соҕотоҕун тутан соһутта да, үөртэ да.
«Бу муоста оҥоһуутун былаана өйбөр киирбитэ ыраатта. Тоҕо диэтэр, ааспыт сылларга улахан уу кэлэн, муосталар дэлби алдьаммыттара. Сиэни туоруурга улахан ыарахаттар үөскээбиттэрэ. Ол иһин бу сайын толкуйбун олоххо кииллэрэргэ быһаарыммытым. От үлэтэ бүтээтин кытта, тутуубун саҕалаабытым. Муостабар маһын былырыыҥҥыттан кыра-кыралаан кэрдэн бэлэмнии сылдьыбытым. Бу муоста 15 миэтэрэ усталаах, 2 миэтэрэ кэтиттээх. Сатыы, ат уонна «Буран» көлөлөөх дьоҥҥо аналлаах.
Урукку өттүгэр элбэх муоста туппутум, онон үөрүйэхпин диэххэ сөп. Тутууларым дьоҥҥо туһалыылларыттан олус астынабын. Бу саҥа тутуум эмиэ уһун дьылларга дьоҥҥо туһалыа диэн эрэнэбин».
Маннык дьону ааттаан эрдэхтэрэ -- патриоттар диэн. Дойду, дьон-норуот туһугар, кинилэр олохторо сайдарын-тупсарын туһугар ис санааларыттан кыһаллар, үлэлиир-хамсыыр дьону. Валерийга нэһилиэк олохтоохторо барҕа махталларын тиэрдэллэр. Валерий Афанасьевич туһунан, дьэ, кырдьык этиэххэ сөп: «Маннык дьонноох буоламмыт...»
Изабелла Ноговицына,
Орто Халыма, Өлөөкө Күөлэ.
- 0
- 0
- 0
- 0
- 0
- 0