Бу ааһан иһэр 2020 сыл, аан дойду үрдүнэн, элбэх ыарахаттары аҕалла. Ол курдук, сыл саҕаланыаҕыттан COVID-19 диэн саҥа коронавируснай инфекция диэн дьаҥ өрө туран олоххо-дьаһахха, үлэҕэ-хамнаска элбэх мэһэйдэри да, саҥа өрүттэри да киллэрдэ.

Быйыл, улууспутугар даҕаны, өрөспүүбүлүкэҕэ даҕаны –  элбэх киһилээх тэрээһиннэр ыытыллаллара тохтотуллубута. Оройуон Сэбиэтин сис хамыыһыйаларын, Президиумун мунньахтара ыраахтан олоруу көрүҥүнэн ыытыллыбыттара. Онно Оройуоммут Сэбиэтин регламеныгар сөптөөх уларытыыны ылыммыппыт. Оройуон Сэбиэтин дьокутааттара харчы хомуйан Бүлүүбүт улууһун миэдиктэригэр харыстыыр анал көстүүмнэри биэрбиппит. Ону таһынан, “Кэнчээри” Бүлүүтээҕи оҕо социальнай реабилитационнай киинэ ыыппыт “Үтүөнү оҥор” (“Твори Добро”) диэн ааахсыйатыгар кыттыһан бородуукта нобуордарын ылан биэрбиппит.

Бэс ыйын 25 күнүттэн от ыйын 1 күнүгэр диэри Арассыйа Төрүт Сокуонугар – дойдубут сүрүн сокуонугар уларытыы киирэригэр куоластааһын ыытыллыбыта. Ону таһынан балаҕан ыйын 13 күнүгэр уонна сэтинньи 1 күнүгэр Бүлүү улууһун кэккэ муниципальнай тэриллиилэригэр баһылык уонна дьокутааттар быыбардара буолан ааспыттара.

Быйыл улууспут мэдиссиинэтин сайдыытыгар биир эмиэ улахан хардыы оҥоһулунна, ол курдук ахсынньы 1 күнүгэр  компьютернай томография кабинета арыллан үлэтин саҕалаата. Бу компьютернай томография бүүс-бүтүннүү улуус бүддьүөтүн үбүнэн ылылынна.

Бүлүү куоратын “Ленин” уонна “Мир” уулуссаларыгар 6,2 км. Усталаах учаастактара федеральнай бас билиигэ бэриллэн инникитин хапытаалынай өрөмүөнүгэр туһааннаах үлэлэр ыытылыннылар.

Улууска кэккэ тутуулар кэминэн бара тураллар. Кыһыл Сыырга хаарбах дьиэттэн көһөрүү бырагырааматынан үс 8-тыы кыбарытыыраах дьиэ, Сосновкаҕа 150 миэстэлээх Бүлүүтээҕи психоневрологическай интернат утуйар куорпуһа, Бүлүүгэ Култуура Дыбарыаһын дьиэтэ уонна тулаайах оҕолорго элбэх кыбартыыралаах дьиэлэр тутулла тураллар.

Биллэрин курдук, биһиги бары кэлэр 2021 сылтан үтүөнү уонна сырдыгы, ыра санааларбыт туолууларын күүтэбит, эрэнэбит.

Үүммүт сылга олохпут-дьаһахпыт тупсарыгар, судаарыстыбабыт өйөбүллэрэ өссө элбээн уонна улаатан иһэллэригэр, дьоммут-сэргэбит уйгута тупсарыгар баҕарабын. Бары быр-бааччы байылыат олохтоох буолуҥ! Саҥа дьылынан!