2019 сыллаахха айанньыт, англичанин Никита Греци саха аттарынан ити хайысханан айанныыр идиэйэтин аан дойдутааҕы атынан айаннааччылар уопсастыбалара (гильдия) өйөөбүт. Былаан быһыытынан, ити айан быйыл буолуохтааҕын коронавирус дьаҥа орооспута чуолкай. Британия штамматыттан сылтаан Никита Греци Саха сиригэр кэлэрэ көһөрүллүбүт. Эрдэтээҥҥи быһаарсыынан Никита Греци уолаттары кытта Өймөкөөнтөн турунуохтаах этилэрэ. Дугуйдаан Винокуров кэтэһэ сатаан баран, күтүөтүн кытта ити хайысха диэки муоһаны тутан кэбистилэр. Онуоха, дьэ, уолаттар аҕыйах күн айаннаабыттарын кэнниттэн аан дойдутааҕы атынан айаннааччылар уопсастыбалара (гильдия) саха уолаттарын Никита Греци идиэйэтин үтүгүннүлэр (плагиат) диэн эттилэр. Онон аан дойду таһымнаах аҕыс айдаан тахсыан иннинэ биллиилээх урбаанньыт, уопуттаах атынан айанньыт Егор Макаров, үөскээн эрэ мөккүөрү уҕарытар сыалтан, уолаттары көрсөн сүбэлииргэ быһаарыммыт. Хаандыга бөһүөлэгин аттыгар көрсөн, баар балаһыанньаны кэпсээн, уолаттар ону тута өйдөөн, атын маршруту толкуйдаан айанныырга сөбүлэҥнэрин биэрбиттэр. Онон бэрт сотору кэминэн Дугуйдаан Винокуровтаах ханнык хайысханан уонна ханнык тосхолу тутуһан айанныылларын этиэхтэрэ.
- 0
- 0
- 0
- 0
- 0
- 0