Тэрээһиҥҥэ М.К.Аммосов аатынан ХИФУ Тыл уонна култуура институтун иһинэн үлэлиир «Уран иис» үрдүкү маастарыстыбатын оскуолатын маастардара (сал. и.н.к. Петрова С.И.), «Уран Саха» ювелирнай фирма (ген.дириэктэр Егоров Л.М.) кыттыыны ылыахтара.
Бырагырааматтан кылгастык билиһиннэрэр буоллахха, 11 чаастан «Уран Саха» көмүс киэргэллэрин уонна Саха сиринээҕи «Айар» (Бичик) кинигэ издательствотын кинигэлэрин атыыта буолуоҕа. Салгыы
«Ыһыах» диэн анал экспозиция аһыллыаҕа. Уран тарбахтаахтар халадаай ырбаахы, кэһиэччик ньэмиэтин кырыттарааччы бэйэтин матырыйаалыттан быһан биэриэхтэрэ. Итини тэҥэ, дьабака бэргэһэ чопчууругар быысапка анньыытыгар, сахалыы кыбытан аттаран тигиигэ, оҕуруону тиһиигэ, өттүк симэхтэрин оҥорорго, кылы өрүүгэ уонна мааны кытыылаах сону кырыйыыга, тигиигэ маастар-кылаастар ыытыллыахтара. Үөрэниэн баҕалаахтар эрдэттэн 40-35-97 диэн төлөпүөҥҥэ эрийэн суруттарыаххытын эмиэ сөп.
Тэрээһин бырагырааматын чэрчитинэн, «Саха таҥаһын киэргэллэрин, оhуордарын суолталара», «Народный костюм якутов», «Современная якутская одежда», «Өбүгэ таҥаһа уонна итэҕэл» уо.д.а. саха таҥаһыгар элбэх кинигэлэр ааптара С.И.Петрова анал лиэксийэ ааҕыаҕа. С.И.Петрова сценарийынан оҥоһуллубут «Сүктүү» киинэни көрдөрүөхтэрэ. Киинэ режиссера Мария Кобельянова – Тускулаана.
Уруу таҥаһын-сабын көрдөрүүгэ Хаҥалас улууһун Нөмүгү нэһилиэгин «Эркээни утума» иистэнньэҥнэр түмсүүлэрэ, Покровскайтан «Ай-тик-куо» (сал. Анисия Фадеева), Дьокуускай куораттан «Кырадаһын абылаҥа» (сал. Дария Козлова), Намнааҕы педколледж «Сардаана» муода-тыйаатыра (сал. Зинаида Понохова, Надежда Стручкова), иистэнньэҥ Варвара Егорова-Дыгыйа кыттыахтара.
Онон маннык үтүө тэрээһиҥҥэ Дьокуускай куорат ытык-мааны олохтоохторун, ыалдьыттарын кэтэһэллэр, күүтэллэр. Тэрийээччилэр маасканы кэтии эрэсиимэ уонна социальнай дистанция булгуччу тутуhалларын толору мэктиэлииллэр.
- 0
- 0
- 0
- 0
- 0
- 0