Сунтаар гимназиятын ХI кылааһын үөрэнээччитэ Игорь Львов, уруогуттан кэллэ да, гаражка баран, эһээтин кытта бадарааҥҥа да батыллыбат, суола да суох сиргэ сүүрэр массыынаны таҥан оҥоро сылдьарын, бука, кылааһынньыктара эмиэ билбэттэрэ буолуо. Оттон Игорь олох кыра эрдэҕиттэн тимири, маһы кытта бодьуустаһар дьарыктаах эбээт!

Оройуоҥҥа биллэр рационализатор эһээтэ Аркадий Львович Петров сиэнин Игоры бэһис кылаастан ыла сыбааркалыырга, болгарканан, онтон да атын уһанар тэриллэринэн туттарга уһуйан саҕалаабыт.

 -- Бастаан маска ылсыбытым. Чорооннору кыһан оҥортообутум. Сэттискэ үөрэнэ сылдьан, саха быһаҕар холонон көрбүтүм. Эһээм уһааран буолбакка, илиинэн аалан-чочуйан оҥорорун үтүктэн. Онтон эһиилигэр икки хомуһу бэлэмнээбитим. Бэйэм “маннык буолуо” диэн, сэрэйэн диэххэ дуу, хайдах саныырбынан оҥорор буолан, наһаа үчүгэйэ суох тыастаахтар этэ.Төгүрүк сыҥааҕын сатаабатахпын быһыылаах.  

  Игорь кыра эрдэҕиттэн сэрии туһунан сэбиэскэй киинэлэри сөбүлээн көрөр эбит. Ол иһин аны кэнники кэмҥэ сэрии сэбин-сэбиргэлин, малын тимиртэн оҥорор идэлэммит.

-- Эмиэ сэттискэ сылдьан эбит, пилорама эрбиир болотунатыттан (пильное полотно) дьоппуон саабылатын болгарканан быһан, онно шлифовальнай төгүнүгү олордон, кылааккай гына нырылаан оҥорбутум. Уга хатыҥ удьурҕайыттан. Табыллыбытыттан үөрэн, аны наар Аҕа дойду Улуу сэриитигэр сыһыаннаах малы-тэрили оҥорон кэллиэксийэлииргэ соруммутум. Холобур, ити саабылам милитаристскай Японияны кытта кыргыһыыны кэрэһилиир.

Мэдиссиинэҕэ туттуллар гиипсэнэн, хордуон киэпкэ сыбаан, ньиэмэс каскатын, ылтаһынтан бөлөмүөт-бэстилиэти, ыстаал турбаттан сааны   оҥорбут.

-- Көстүүлэрэ дьиҥнээх курдугун иһин, бу ытар сэбиргэллэр буолбатах, макыаттар эрэ.  Ол быыһыгар эһээбэр көмөлөһөн, “переломка вездеходу” оҥорсобун. Мотуора –“Ока”, муостата (мост) – “Surf, рессората – “Волга”, “раздаточнай коробката” – “Нива”, көлүөһэтэ – “крузак” диискэлэрин кэҥэтэн.

   Матасыыкылын Игорь эмиэ бэйэтэ ыһар-хомуйар. Эһээтэ ыйан-кэрдэн, сүбэлээн биэрэн иһэр. Бэйэтин сатабылын сиэнигэр иҥэрэрэ, уһанарга уһуйара наһаа хайҕаллаах.

--Биир да уус куруһуогар сылдьыбаппын. Этэргэ дылы, “самоучкабын”. Эһээбин көрөн үөрэнэбин. Кини холобура, сүбэтэ ханнык да уһуйааннааҕар миэхэ быдан туһалаах, көдьүүстээх уонна  өйдөнүмтүө.

Үөрэхпэр ортобун. Технология эрэ уруогар үчүгэйбин. Учууталым Андриан Егорович Максимов олимпиадаҕа кытыннарааччы. Эһиил оскуолабын бүтэрдэхпинэ, чугастыы Мииринэйгэ үөрэнэ барыам. Эһээм курдук сыбааркаһыт буолуохпун баҕарабын. Олоххо олус наадалаах идэ дии саныыбын. Тимири кытта үлэлиирбин сөбүлүүбүн.

Киһи бэйэтин дьоҕурунан идэтин таллаҕына, үлэтиттэн дуоһуйууну эрэ ылар. Онон Игорь туохха талааннааҕынан көрөн быһаарыммыта саамай сөптөөх. Уус уолга ситиһиилэри баҕарыаҕыҥ!