Алена Атласова, Ил Түмэн дьиэ кэргэн уонна оҕо аймах дьыалаларыгар сис кэмитиэтин бэрэссэдээтэлэ:

- Бэс ыйын маҥнайгы күнүгэр үгэс быһыытынан Оҕо көмүскэлин күнүн бэлиэтиибит. Бу оҕо дьоллоох күлүүтүнэн туолбут, чаҕылхай күннээх истиҥ бырааһынньыгынан буолар. Ону кытта бу күн оҕолорбутугар ураты сылаас сыһыан ирдэнэрин санатар. Үүнэр көлүөнэбит туһугар кыһаллыы – бу биһиги өрөспүүбүлүкэбит саамай сүрүн соругунан буолар. Саха өрөспүүбүлүкэтигэр оҕо быраабын уонна көмүскэлин мэктиэлиир сөптөөх нормативнай докумуоннар бааллар, оҕо аймах уонна дьиэ кэргэн, доруобуйа харыстабылын, үөрэхтээһин, култуура уонна спорт хайысхаларынан социальнай бырагыраамалар олоххо киирэллэр. Оҕолоох дьиэ кэргэни өйүүр миэрэлэри, судаарыстыба өйөбүлүгэр наадыйар оҕоҕо болҕомтолоох буолуу көдьүүстээх систиэмэтин оҥоруу уонна баар сокуоннары салгыы эбэн-сабан сайыннарыы – бу Ил Түмэн дьиэ кэргэн уонна оҕо аймах дьыалаларыгар сис кэмитиэтин өрөспүүбүлүкэ салалтатын кытары ыкса үлэлэһэн олоххо киллэрэр соругунан буолар.

Бу күн оҕолоругар дьоллоох оҕо сааһы бэлэхтиир дьиэ кэргэҥҥэ улахан махталбытын тиэрдэбит. Биһиги бары хас биирдии оҕо көмүскэллээх уонна дьоллоох буоларыгар кыһаллыахтаахпыт. Оҕолорго барыларыгар уонна төрөппүттэргэ чэгиэн доруобуйаны, дьолу, үтүөнү баҕарабын!

Бэйэм оҕо сааһым туһунан ахтар буоллахпына, оҕо сааһым дьоллоохтук, сырдык күн аннынан ааспыта. Эдьиийдэрим тапталларынан угуттанан улааппыт оҕобун. Кыра эрдэхпиттэн,  дьааһылаҕа сылдьыахпыттан хоһоон эттэрэллэрэ. Нууччалыы хоһоон эппиппин бастаан араадьыйанан истэн баран олус дьиктиргээбиппин өйдүүбүн. Ол курдук кырабыттан олус көхтөөх, сэргэх оҕо этим. Кэнсиэркэ кыттан ырыа ыллыырым, хоһоон этэрим. Оскуола сылдьан Леня Голиков аатынан пионердар этэрээттэрин бэрэссэдээтэлинэн буолбутум, онтон дружина бэрэссэдээтэлинэн, ол кэннэ комсомоллар тэрийээччилэрэ буолан, оскуола уопсастыбаннай олоҕор кыттарым. Ол курдук, мин оҕо сааһым чаҕылхай сардаҥаларынан кустуктана оонньообут күн курдук ааспыта.  

Феодосия Габышева, норуот дьокутаата, Ил Түмэн наукаҕа, үөрэххэ, култуураҕа, маассабай сонуну киэҥник тарҕатыыга  уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ:

-  Мин кыра эрдэхпинэ, уолаттар үксүлэрэ летчик, космонавт, онтон кыргыттар быраас, учуутал буолуохтарын баҕараллара. Үрдүкү кылааска историяҕа, обществознаниеҕа үчүгэй бэлэмнээх буоламмын юрист буолуохпун баҕарарым. Ол гынан баран,  дьүөгэбин, кылааспыт ыстаарыстата Таня Рудыхтыын педагогическэй институкка туттарсан киирбиппит. Онон педагогика олохпор улахан оруолу ылан, билиҥҥи диэри онон дьарыктанан, үлэлээн кэллим. Дьылҕа хаан быһаарыытынан оҕолорум барахсаттар  юрист үөрэҕин баһылаабыттара. Дьокутаат буоламмын билигин  үлэм юрист хайысхатын кытта ыкса сибээстээх. Онон оҕо эрдэҕинээҕи ыра санаам туолбут. Мин аҕам тапталлаах кыыһа этим. Кини куруук миигин хаартыскаҕа көтөҕөн түһээччи. Түгэнинэн туһанан,  Оҕо көмүскэлин уонна төрөппүт күннэринэн Саха сирин олохтоохторун барыгытын эҕэрдэлиибин! Хас биирдии ыалга оҕо дьоллоох күлүүтэ эйээрдин, оҕо минньигэс саҥата чуопчаардын!

 Гаврил Алексеев,  норуот дьокутаата, «Сахаэнерго» АУо генеральнай дириэктэрин солбуйааччы:

- Мин дьоллоох оҕо сааһым Горнай улууһун Күөрэлээҕэр ааспыта. 10-с кылаастан Бэрдьигэстээх гимназиятыгар үөрэммитим.  Ханнык баҕарар тыа сирин оҕотун курдук  кыһын үөрэнии,  сайын от үлэтигэр умса түһүү, лааҕырга сылдьан дулҕа быһыыта, лабыкта хомуйуута. Аҕам курдук экэнэмиис буолар баҕалаах этим, ол ыра санаам туолан, ити эйгэҕэ үлэлии сылдьабын. Бу үтүө, сырдык бырааһынньыгынан Саха сирин ытык-мааны олохтоохторун эҕэрдэлиибин. Кырачааннарбытын өрүү харыстыаҕыҥ, үтүө-мааны дьон буолан улааталларын туһугар кыһаллыаҕыҥ, үлэлиэҕиҥ!