«Аныгы наука кыаҕа муҥура суох. Дьон-сэргэ олоҕо, уйгута тупсарыгар туһуламмыт научнай чинчийиилэр айылҕаҕа, тулалыыр эйгэҕэ харыстабыллаах сыһыаҥҥа олоҕуран ыытыллар кэмнэрэ үүннэ. Наука онно сөптөөх хайысханы талан, ураты бырайыактары олоххо киллэрэригэр кыах бэрилиннэ. Кэлэр кэнчээри ыччат ааттаах-суоллаах, кыырыктыйбыт төбөлөөх учуонайдарбытыттан тирэх ылан, кинилэр сүбэлэринэн-амаларынан төрөөбүт дойдуларын, Арассыыйаны сайыннарар саҥа идеялары тобулуохтара диэн эрэнэбин», — диэн Өрөспүүбүлүкэ Ил Түмэнин аатыттан спикер Петр Гоголев эҕэрдэ тылын саҕалаата.

«Кыайыы 75 сылыгар оччотооҕу кэм ураты арыйыыларын,уһулуччулаах учуонайдарын билиҥҥи көлүөнэ билиэх уонна холобур оҥостуох тустаах. Аҕа дойду улуу сэриитэ сытыы өйдөөх, тобуллаҕас санаалаах учуонайдары, инженердэри, конструктордары, оробуочайдары түмэн, техническэй сайдыыны күөртээбитэ. «Фашисткай Германия кыайтарбыт биир төрүөтэ Сэбиэскэй наука кыаҕын аанньа ахтыбатаҕар сытар” диэн академик Сергей Вавилов этэн турардаах. Сэриигэ Дьокуускайдааҕы пединституттан, учууталлар институттарыттан уонна педүлэһиттэр факультеттарыттан 63 киһи фроҥҥа аттаммыта. Иннокентий Попов, Николай Самсонов,  Николай Романов, Михаил Федоров курдук эдэр учуонайдар, кэскиллээх ыччаттар сэрии толоонугар чиэстээхтик кыргыспыттара. Сорохтор этэҥҥэ эргиллэн кэлэн наукаҕа үлэлэрин салҕаабыттара. Сэрии кинилэри өссө дьаныардаахтык, туохтан да толлубакка иннин диэки дьулуһарга, дьон-сэргэ туһугар үлэлииргэ үөрэппитэ саарбахтаммат.

Биһиги өрөспүүбүлүкэҕэ наукаҕа олохторун анаабыт биллиилээх учуонайдар, дойдуларын өйө-санаата сайдарын туһугар үлэлиир научнай оскуолалар бааллар. Ол курдук, Аан дойдуга биллэр академиктар Павел Мельников, Николай Черскай, Владимир Ларионов, Гермоген Крымскай, Дмитрий Красильников уо.д.а. оскуолалара күн бүгүн ситиһиилээхтик үлэлиир», — диэн туран Петр Гоголев наукаҕа үрдүк ситиһиилээх устудьуоннарга, учуонайдарга наҕараадалары туттартаата.

Ирина Ханды