Ол курдук, быйылгы параадка 250 хараабыл кыттыаҕа. Ити былырыыҥҥытааҕар 100 муора аалынан элбэх. Ону таһынан 15 тыһыынча муора байыаннайа, 80 сөмөлүөт уонна бөртөлүөт, 100-тэн тахса сиринэн сылдьар араас тиэхиньикэ кыттара былааннаммыт.

Арассыыйа Бэрэсидьиэнэ Владимир Путин Санкт-Петербурга кэлэн параады көрүөҕэ. Өссө ыам ыйыгар Бэрэсидьиэн оборуона миниистиригэр Сергей Шойгуга үтүө үгэскэ кубулуйбут параадтары Арассыыйа флотун сүрүн базаларыгар үрдүк тэрээһиннээхтик ыытарыгар сорудахтаабыта.

Санкт-Петербурга байыаннай параадка 46 байыаннай хараабыл, мотуордаах оҥочо, уо.д.а. уу ааллара кыттыахтара. Ол иһигэр фрегат “Адмирал Касатонов”, подводнай лодкалары утары улахан хараабыл “Вице-адмирал Кулаков”, аракыаталаах дьоҕус хараабыллар, корветтар, уу аннынааҕы байыаннай ааллар, уо.д.а. кыттыахтара. Параадка бастакынан “Полтава” диэн XVI үйэтинээҕи саҥаттан оҥоһуллубут линейнай хараабыл киириэҕэ.

Санкт-Петербург параадыгар салгын ааллара эмиэ кыттыыны ылыахтара. Онно 41 тиэхиньикэ кыттара былааннанар.

Параад быһа холбонуута Арассыыйа сүрүн ханаалларыгар Москуба бириэмэтинэн 11 чаастан саҕаланыа. Саха сиригэр киэһэ 17 чааска көстүөҕэ.

Быһа холбонууга киирэргэ маны баттаа.