1945 сыл балаҕан ыйын 2 күнүгэр, Токио куораттан ырааҕа суох сиргэ турар АХШ “Миссури” диэн линкорун палубатыгар, Япония биир тыла суох бэринэрин туһунан аактаҕа илии баттаммыта. Бу күнтэн ыла Иккис аан дойду сэриитэ түмүктэммитэ.

Докумуоҥҥа союзниктар сэриилэрин үрдүкү салайааччыта, аармыйа генерала Дуглас Макартур, ССРС генерала Кузьма Деревянко, АХШ адмирала Честер Нимиц, Улуу Британия адмирала Брюс Фрейзер, ону тэҥэ Кытай, Австралия, Канада, Франция, Нидерланды уонна Саҥа Зеландия үрдүк чыыннаах байыаннайдара илии баттаабыттара.

Япония Потсдамнааҕы декларация усулуобуйаларын бүтүннүү ылыммыта (1945). Аакт усулуобуйатынан сэрии тута тохтотуллубута, Япония сэбилэниилээх күүстэрэ бары бэриммиттэрэ, сэриилэрин сэбин уурбуттара. Бэринии кэмигэр сэрии сэбин уонна гражданскай баайы-дуолу алдьатар бобуллубута. Япония бырабыытылыстыбатын уонна генштабын союзниктар саллааттарын билиэнтэн босхолуулларыгар, гражданскай сирэйдэри дойдуларыгар төнүннэрэллэригэр сорудахтаабыттара.

2020 сылга Арассыыйаҕа Иккис аан дойду сэриитин түмүктэммит күнэ балаҕан ыйын 2 күнүттэн балаҕан ыйын 3 күнүгэр көспүтэ. Саҥа сокуон ылылларын Арассыыйа дьоруойа, генерал-полковник Владимир Шаманов көҕүлээбитэ. Кини Госдума оборуонаҕа сис кэмитиэтин салайар. Сокуону оҥорооччулар сэрииттэн эйэ олохтоммут күнүн бэлиэтиир ордук оруннаах уонна сиэрдээх диэн бэлиэтииллэр. Ону сэргэ ССРС Үрдүкү Сэбиэтин Президиума балаҕан ыйын 3 күнүн Иккис аан дойду сэриитин түмүктэммит күнүнэн биллэрбитигэр сигэнэллэр. Бу күн Сэбиэскэй кэмҥэ үөрүүлээх тэрээһиннэр ыытыллаллара. Ону Сталин ыйааҕа бэчээттэммит хаһыаттар, араас былакааттар туоһулууллар.

Ытыктабыллаах Саха сирин олохтоохторо! Эһигини Yakutia-pomnit.ru саайтка ыҥырабыт уонна суруктаргытын электроннай аадырыспытыгар: Адрес электронной почты защищен от спам-ботов. Для просмотра адреса в вашем браузере должен быть включен Javascript. күүтэбит.