Үөрүүлээх уонна бэлиэ тэрээһиҥҥэ “Ил Түмэн” Судаарыстыбаннай Мунньаҕын бэрэссэдээтэлэ Петр Гоголев, Дьокуускай баһылыгын солбуйааччы Павел Кириллин, Уус Алдан улууһун бэрэстэбиитэлэ Лена Заболоцкай, Дьокуускай бэтэрээннэрин Сэбиэтин бэрэссэдээтэлэ Николай Тряпша, биир дойдулаахтара, аймахтара, киин куорат олохтоохторо кыттыыны ыллылар.

Өйдөбүнньүк дуоска Дзержинскай уулусса, 28 №-дээх дьиэтин эркинигэр ыйанна. Бу дьиэҕэ өр кэм устата бэтэрээн бэйэтэ олорбута.

Дьокуускай куоракка 1978 сылтан 1993 сылга диэри олорбут бэтэрээҥҥэ аймахтара өйдөбүнньүк бэлиэ туруоруохтарын баҕарбыттара ырааппыт эбит. Ол ыра санааларын Улуу Кыайыы үбүлүөйдээх 75 сылыгар сөп түбэһиннэрэн олоххо киллэрбиттэр. Аймахтар көҕүлээһиннэрин Дьокуускай куорат бэтэрээннэрин Сэбиэтэ, киин куорат думатын дьокутааттара, мээр Сардаана Авксентьева өйөөбүттэр.

Саҥа бэлиэни үөрүүлээх быһыыга-майгыга арыйар бочуоттаах эбээһинэһи бэтэрээн улахан кыыһыгар Светлана Старостина уонна Ил Түмэн бэрэссэдээтэлэ Петр Гоголев толордулар.

Спикер “Ил Түмэн” Судаарыстыбаннай Мунньаҕын уонна тус бэйэтин аатыттан мустубут дьону эҕэрдэлээтэ, итиэннэ бу өйдөбүнньүк дуоска көлүөнэлэри ситимниир бэлиэ буоларын даҕатан эттэ. Ону таһынан биир дойдулааҕын, Уус Алдан улууһун уонна Дүпсүн нэһилиэгин бочуоттаах олохтооҕун И.С. Бочкарев өйдөбүнньүк дуоскатын сүрэхтиир үрдүк чиэскэ тиксибитигэр ис сүрэҕиттэн махтанна. Петр Гоголев Илья Сергеевич курдук сэрии бэтэрээннэрэ урут мэлдьи оскуолаҕа кэлэн хорсун буолуу уруоктарын ыыталларын, саха буойуттарын хорсун быһыыларын туһунан кэпсииллэрин, ыччаты патриотизма уһуйалларын туһунан санатта. “Хас биирдии бэтэрээн биһиэхэ барыбытыгар холобур буолар”, – диэн тоһоҕолоон бэлиэтээтэ.

Үөрүүлээх түгэҥҥэ эҕэрдэ тыллары ыҥырыылаах ыалдьыттар, аймахтара, биир дойдулаахтара эттилэр. Бэтэрээн хос сиэнэ Сайаана Сивцева эһэтигэр анаабыт хоһоонун ааҕан иһитиннэрдэ.

Илья Сергеевич улахан кыыһа Светлана Старостина, Саха сирин үтүөлээх ветеринарнай бырааһа, аҕаларын сырдык кэриэһигэр хас да кинигэни бэчээттэтэн таһаарбыттарын туһунан кэпсээтэ.

Үөрүүлээх тэрээһин сибэкки дьөрбөтүн ууруунан түмүктэннэ.

Ил Түмэн пресс-сулууспатын матырыйаалынан.